16 ліпеня, Мінск /Кар. БЕЛТА/. Хакеісты мінскага "Дынама" ў спарткомплексе "Раўбічы" пачалі падрыхтоўку да новага сезона КХЛ, паведамляе карэспандэнт БЕЛТА.
На лядовай пляцоўцы спартыўнага цэнтра сёння адбылася першая трэніроўка, у якой прынялі ўдзел больш за 20 ігракоў, у іх ліку вядучыя хакеісты Сяргей Касціцын, Андрэй Сцяпанаў, Яўген Лісавец, Аляксандр Кітараў, Куінтан Хаўдэн. Трэнерскі штаб мінчан чакае прыезду вядучага галкіпера Юнаса Энрата і навічкоў форварда Бо Бенета і абаронцы Патрыка Уіркаша. За трэніроўкамі дынамаўцаў разам з журналістамі назіраў адзін з лепшых нападаючых зборнай Беларусі Міхаіл Грабоўскі.
Першую таварыскую гульню пры падрыхтоўцы да сезона дынамаўцы правядуць 2 жніўня ў Мінску, пасля чаго адправяцца на Кубак губернатара Ніжагародскай вобласці, а потым - на традыцыйны турнір Кубак ЛЧ у Рызе.
Мінскае "Дынама" ў чэмпіянаце КХЛ стартуе 3 верасня выязной сустрэчай з казанскім "Ак Барсам", 5 верасня падапечныя Гордзі Дуаера згуляюць у Ніжнім Ноўгарадзе з "Тарпеда", а 7 верасня - з ніжнякамскім "Нафтахімікам". Першы дамашні матч у "Мінск-Арэне" дынамаўцы правядуць 10 верасня супраць фінскага "Ёкерыта".-0-
