25 мая, Мінск /Кар. БЕЛТА/. Футбалісты мінскага "Дынама" прапусцілі гол на апошняй мінуце гульні 10-га тура чэмпіянату Беларусі і ўпусцілі перамогу ў матчы з "Шахцёрам", завяршыўшы матч з лікам 2:2, паведамляе карэспандэнт БЕЛТА.
У пачатку другога тайма сустрэчы на мінскім стадыёне "Трактар", якую наведалі 4,5 тыс. балельшчыкаў, падапечныя галоўнага трэнера Сяргея Гурэнкі вялі - 2:1. Мінчане кантралявалі сітуацыю на полі і маглі вызначыцца галамі яшчэ некалькі разоў. Аднак на чацвёртай дабаўленай мінуце гульні нападаючы "Шахцёра" Сяргей Хіжнічэнка нанёс дакладны ўдар галавой, які дапамог "гарнякам" пазбегнуць паражэння - 2:2.
У другім матчы 10-га тура зафіксаваны нечаканы вынік: магілёўскі "Днепр" нанёс паражэнне на сваім полі фіналісту Кубка Беларусі брэсцкаму "Дынама" - 1:0.
"Ігракам неабходна дзейнічаць больш актыўна, асабліва ў канцоўцы. Самааддача, у любым выпадку, у дынамаўцаў высокая. Аднак перамагае ў матчы каманда, якая менш памыляецца", - адзначыў настаўнік мінскага "Дынама" Сяргей Гурэнка.
Турнірную табліцу чэмпіянату Беларусі па футболе ўзначальвае салігорскі "Шахцёр", які пасля 10 матчаў мае ў сваім актыве 23 ачкі. На гульню менш правялі дзеючыя чэмпіёны краіны футбалісты БАТЭ. Каманда Аляксандра Ермаковіча з 20 ачкамі займае другое месца. Барысаўчане 26 мая згуляюць на выездзе супраць "Віцебска".-0-
