29 сакавіка, Мінск /Уладзімір Мацвееў - БЕЛТА/. Чатырохразовая алімпійская чэмпіёнка па біятлоне, Герой Беларусі Дар'я Домрачава падкрэслівае вялікую значнасць для спартсменаў таго, што іх праца і дасягненні адзначаюцца на дзяржаўным узроўні. Аб гэтым яна заявіла сёння ў інтэрв'ю журналістам, перадае карэспандэнт БЕЛТА.
"Заўсёды прыемна, што такія цырымоніі адбываюцца. Вядома, гэта здорава, што праца, якую мы робім на працягу сезона, цэніцца. Для нас гэта вельмі важна, - сказала спартсменка. - Сёння я яшчэ ўсё роўна не да канца ўсведамляю ўсю значнасць гэтых узнагарод і высокіх званняў. Усю іх каштоўнасць я разумею, але, напэўна, адчую ўсё ж такі яшчэ на працягу гадоў, з узростам, ужо калі буду старэнькай бабулькай расказваць унукам пра свае дасягненні".
Дар'я Домрачава адзначыла, што біятлонны сезон завяршыўся літаральна некалькі дзён таму і, вядома, прысутнічае стомленасць за доўгія этапы, аднак настрой у дзень уручэння дзяржузнагарод у яе святочны.
Як паведамлялася, за высокае прафесійнае майстэрства і выдатныя спартыўныя дасягненні Дар'і Домрачавай уручаны ордэн "За асабістую мужнасць". Аналагічнай узнагароды, а таксама ганаровага звання "Заслужаны майстар спорту Рэспублікі Беларусь" удастоены алімпійскія чэмпіёнкі Дзінара Алімбекава, Ірына Крыўко і Надзея Скардзіна.-0-
