3 мая, Мінск /Кар. БЕЛТА/. Чатырохразовая алімпійская чэмпіёнка па біятлоне Дар'я Домрачава з-за хваробы не зможа прыняць удзел у цырымоніі запальвання агню II Еўрапейскіх гульняў, якая адбудзецца сёння ў Рыме. Аб гэтым 2 мая паведаміў на прэс-канферэнцыі кіраўнік фонду "Дырэкцыя II Еўрапейскіх гульняў 2019 года" Георгій Катулін, паведамляе ТАСС.
Урачыстая цырымонія запальвання агню эстафеты II Еўрапейскіх гульняў "Полымя міру" пройдзе ў Рыме ў музейным комплексе Ara Pacis. Першапачаткова планавалася, што ў гэтым мерапрыемстве прымуць удзел праслаўленыя беларускія спартсмены: чатырохразовая алімпійская чэмпіёнка па фехтаванні Алена Бялова, чатырохразовая алімпійская чэмпіёнка па біятлоне Дар'я Домрачава, алімпійскі чэмпіён па скачках на батуце Уладзіслаў Ганчароў і алімпійская чэмпіёнка ў бегу на 100 м Юлія Несцярэнка.
"На жаль, Дар'я Домрачава з-за хваробы не зможа прыняць удзел у гэтай цырымоніі", - сказаў Георгій Катулін.
Маршрут эстафеты II Еўрапейскіх гульняў "Полымя міру", якая таксама стартуе 3 мая ў Рыме, пройдзе праз 55 населеных пунктаў на тэрыторыі васьмі краін (Італія, Славакія, Славенія, Венгрыя, Аўстрыя, Чэхія, Польшча і Беларусь), яго працягласць складзе 7700 км. У эстафеце агню прымуць удзел 450 факеланосцаў, 100 валанцёраў і 10 захавальнікаў агню. Полымя II Еўрапейскіх гульняў падымецца на гару Манблан, наведае выдатныя мясціны краін па маршруце эстафеты, а 12 мая прыбудзе ў Беларусь, дзе пабывае ў нацыянальным парку "Белавежская пушча", сплавіцца па Аўгустоўскім канале, наведае сядзібы Тадэвуша Касцюшкі і Міхала Агінскага, замкі ў Міры і Наваградку, спусціцца ў салявыя шахты.
Эстафета агню II Еўрапейскіх гульняў прадоўжыцца 50 дзён і завершыцца 21 чэрвеня ўрачыстым запальваннем чашы алімпійскага агню на цэнтральнай арэне гульняў - Нацыянальным алімпійскім стадыёне "Дынама" ў Мінску. Еўрапейскія гульні пройдуць у Мінску з 21 па 30 чэрвеня. Больш за 4 тыс. атлетаў з 50 краін разыграюць 199 камплектаў узнагарод у 15 відах спорту.-0-
