Сцяг Чацвер, 28 сакавіка 2024
Усе навіны
Усе навіны
Спорт
29 сакавіка 2019, 10:18

Дэлегаты НАКаў Еўропы высока ацанілі гатоўнасць Мінска да II Еўрапейскіх гульняў

29 сакавіка, Мінск /Кар. БЕЛТА/. Дэлегаты нацыянальных алімпійскіх камітэтаў Еўропы высока ацанілі гатоўнасць беларускай сталіцы да мультыспартыўнага форуму, які пройдзе 21-30 чэрвеня, паведамілі БЕЛТА ў прэс-службе фонду "Дырэкцыя II Еўрапейскіх гульняў 2019 года".

У праграму знаходжання гасцей былі ўключаны сумесныя пасяджэнні з прадстаўнікамі дырэкцыі і ЕАК, а таксама візіт на спартыўныя аб'екты і ў Вёску спартсменаў.

"Я ўжо не першы раз у Мінску і магу сказаць, што гэты горад прыемна здзіўляе мяне зноў і зноў. Відаць высокі ўзровень гатоўнасці аб'ектаў і прапрацоўкі многіх пытанняў, - адзначыў кіраўнік аддзела алімпійскага камітэта Расіі Леў Савін. - Упэўнены, што II Еўрапейскія гульні ў Мінску пройдуць на самым высокім узроўні, а з пункту гледжання цікавасці балельшчыкаў і паказаных рэзультатаў Гульні могуць пераўзысці папярэднія".

Сваімі ўражаннямі ад знаходжання ў беларускай сталіцы падзялілася дырэктар па забеспячэнні ўдзелу ў Алімпійскіх гульнях НАК Польшчы Мажэна Кашэўска: "Наведваючы аб'екты, я падумала, што зайздрошчу Мінску з яго сучаснай спартыўнай інфраструктурай. Для нас вельмі важна было прыехаць і самім убачыць аб'екты, Вёску спартсменаў, сустрэцца са спецыялістамі розных напрамкаў падрыхтоўкі. Рэзультаты гэтага візіту дапамогуць нам у планаванні ўдзелу польскай дэлегацыі ў Гульнях".

Падводзячы вынікі візіту прадстаўнікоў Нацыянальных алімпійскіх камітэтаў, дырэктар фонду "Дырэкцыя II Еўрапейскіх гульняў 2019 года" Георгій Катулін заўважыў, што для арганізатараў было важна не толькі даць справаздачу аб гатоўнасці Мінска да Гульняў, але і атрымаць ацэнку сваёй работы з боку іх непасрэдных удзельнікаў - шэфаў місій і прадстаўнікоў каманд, а таксама пераканацца, што ўсе патрабаванні, неабходныя для задавальнення пажаданняў лепшых атлетаў Еўропы, якія ўдзельнічаюць у кантынентальным форуме, выконваюцца. Паколькі ад узроўню арганізацыі Гульняў у Мінску і ўзроўню сэрвісу залежыць непасрэдна не толькі іх рэзультат на саміх спаборніцтвах, але і лёс Алімпійскіх пуцёвак у Токіа.

У мерапрыемстве прынялі ўдзел 36 дэлегатаў 17 спартыўных арганізацый, а таксама прадстаўнікі Еўрапейскіх алімпійскіх камітэтаў - выканаўчы дырэктар Еўрапейскіх гульняў Сайман Клег, галоўны кансультант ЕАК па правядзенні Еўрапейскіх гульняў Пірс О'Калаган і галоўны кансультант фонду "Дырэкцыя II Еўрапейскіх гульняў 2019 года" Ласла Вайда.-0-

Падпісвайцеся на нас у
Twitter
Топ-навіны
Свежыя навіны Беларусі