10 мая, Мінск /Кар. БЕЛТА/. Караван эстафеты агню II Еўрапейскіх гульняў "Полымя міру" хутка наблізіцца да меж Беларусі, і першым яго прыме Брэст - ужо 12 мая, паведамілі БЕЛТА ў Фондзе "Дырэкцыя II Еўрапейскіх гульняў 2019 года".
Сустрэча агню і старт эстафеты ў Беларусі запланаваны на Цырыманіяльнай плошчы Брэсцкай крэпасці ў 18.00. Крыху пазней у гэты ж дзень на плошчы Леніна ў абласным цэнтры адбудзецца ўрачысты канцэрт.
Маршрут па тэрыторыі Брэсцкай вобласці праляжа праз найбольш значныя мясціны. Па іх з 12 па 13 мая "Полымя міру" пранясуць больш за 60 факеланосцаў: Юлія Несцярэнка, Юрый Вашчук (ТЭА), Георгій Калдун, Алена Варабей, Алег Юрэня, Наталля Гелах і іншыя вядомыя ўраджэнцы Брэсцкага рэгіёна - каб пазнаёміць жыхароў і гасцей з самым буйным у гісторыі Беларусі мультыспартыўным форумам, які пройдзе ў Мінску з 21 па 30 чэрвеня.
Эстафета "Полымя міру" стартавала 3 мая ў Рыме і завершыцца 21 чэрвеня ўрачыстым запальваннем чашы алімпійскага агню на цэнтральнай арэне II Еўрапейскіх гульняў - Нацыянальным алімпійскім стадыёне "Дынама". Усяго агонь гульняў пранясуць праз 55 населеных пунктаў на тэрыторыі 8 краін (Італія, Славакія, Славенія, Венгрыя, Аўстрыя, Чэхія, Польшча і Беларусь), а яго працягласць складзе 7700 км. У эстафеце прымуць удзел 450 факеланосцаў, 100 валанцёраў і 10 захавальнікаў агню.
Полымя II Еўрапейскіх гульняў пабывала ўжо на вяршыні Манблан, у іншых славутасцей розных краін па шляху перамяшчэння эстафеты. 9 мая агонь II Еўрапейскіх гульняў сустрэлі ў Аўстрыі. У Беларусі, як чакаецца, ён азарыць усе куткі нашай краіны: пройдзе сцежкамі нацыянальнага парку "Белавежская пушча", сплавіцца па Аўгустоўскім канале, наведае сядзібы Касцюшкі і Агінскага, замкі ў Міры і Навагрудку, спусціцца ў салявыя шахты "Беларуськалія" і г.д.-0-
