27 ліпеня, Мінск /Кар. БЕЛТА/. Гандбалісты маладзёжнай зборнай Беларусі (U-20) прайгралі ў заключным матчы першага этапу чэмпіянату Еўропы (дывізіён 2) у македонскім Скоп'і, паведамляе карэспандэнт БЕЛТА.
Пасля чатырох вікторый запар у папярэдняй групе А беларусы ў 5-м туры ўступілі камандзе Фарэрскіх астравоў з лікам 22:29, але ўсё роўна занялі першае месца. Да гэтага падапечныя Алега Шарэйкі перамаглі равеснікаў з Фінляндыі (39:30), Грэцыі (34:24), Эстоніі (29:22) і Літвы (30:20).
Падагульняючае становішча каманд: Беларусь - 8 ачкоў, Фарэрскія астравы - 6, Літва - 5, Эстонія - 4, Грэцыя - 4, Фінляндыя - 3.
У папярэдняй групе В каманды фінішавалі ў такім парадку: Македонія - 7, Швейцарыя - 6, Украіна - 4, Італія - 3, Вялікабрытанія - 0.
Цяпер у суботу, 28 ліпеня, у матчы за выхад у фінал беларускія гандбалісты сустрэнуцца з камандай Швейцарыі, а фарэрцы будуць сапернічаць з македонцамі. Пераможцы паўфінальных матчаў 29 ліпеня згуляюць у паядынку за першае месца і адзіную пуцёўку ў элітны дывізіён кантынентальнага маладзёжнага першынства. Няўдачнікі паўфіналаў паспрачаюцца за трэцюю пазіцыю.-0-