30 ліпеня, Мінск /Кар. БЕЛТА/. Гандбалісты маладзёжнай зборнай Беларусі (U-20) занялі другое месца на чэмпіянаце Еўропы (дывізіён 2) у Скоп'і і не выйшлі ў элітную групу кантынентальнага першынства ў гэтай узроставай катэгорыі, паведамляе карэспандэнт БЕЛТА.
У вырашальным паядынку за адзіную пуцёўку ў элітны дывізіён беларускія гандбалісты ўступілі гаспадарам турніру македонцам з лікам 23:29. На спаборніцтвах у сталіцы Македоніі каманда Алега Шарэйкі заняла першае месца ў папярэдняй групе А, перамогшы сапернікаў з Грэцыі (34:24), Эстоніі (29:22), Літвы (30:29), Фінляндыі (39:30) і ўступіўшы фарэрцам (22:29). У паўфінале беларусы перайгралі равеснікаў са Швейцарыі з лікам 33:27. Швейцарцы фінішавалі трэцімі, разграміўшы ў матчы за бронзу фарэрцаў з лікам 32:17.
Па выніках турніру ў Скоп'і яго лепшым іграком прызнаны беларус Артур Рудзь. Два беларускія гандбалісты ўвайшлі ў сімвалічную зборную ЧЕ - разыгрываючы Юльян Гірык і правы паўсярэдні Мікалай Алёхін. Лепшым бамбардзірам стаў літовец Кароліс Антанавічус, які закінуў 53 мячы.
Чэмпіёнамі Еўропы ў гэтай узроставай катэгорыі ў славенскім Цэле сталі гандбалісты Славеніі, якія перайгралі ў фінале французаў - 31:30, бронза ў зборнай Германіі, якая перамагла партугальцаў з лікам 29:26. Пакідае эліту маладзёжнага першынства Старога Свету каманда Польшчы.-0-
