12 ліпеня, Мінск /Кар. БЕЛТА/. Беларускія валейбалісты занялі шостае месца на юнацкім чэмпіянаце Еўропы (U-17) у Турцыі, паведамляе карэспандэнт БЕЛТА.
На папярэдняй стадыі турніру ў групе падапечныя Аляксея Кавалёва былі трэцімі. У барацьбе за 5-8-е месцы ў плэй-оф беларусы перамаглі валейбалістаў Грэцыі 3:0 (25:20, 25:12, 25:17), а ў матчы за пятае месца не змаглі адолець расіян - 0:3 (24:26, 19:25, 22:25). Адным з лепшых ігракоў спаборніцтваў стаў Уладзіслаў Давыскіба - 142 ачкі ў фінальным турніры і другі паказчык сярод самых рэзультатыўных ігракоў.
Чэмпіёнам Еўропы сярод юнакоў стала зборная Італіі, якая ў фінале абыграла Бельгію з лікам 3:2. Бронзавым прызёрам стала каманда Турцыі. У паядынку за трэцяе месца яна была мацнейшая за балгарскіх валейбалістаў. Адзначым, што ўладальнікі залатых узнагарод пацярпелі паражэнне ў групе ад беларусаў з лікам 1:3.
У бягучым месяцы ў беларускіх валейбалістаў яшчэ два важныя турніры. Зборная дзяўчат да 16 гадоў пад кіраўніцтвам Ягора Пімахіна адправілася ў балгарскі Самакаў, дзе адбудзецца фінальная стадыя чэмпіянату Еўропы (21-29 ліпеня). Юніёрская зборная Беларусі сярод дзяўчат да 18 гадоў як бронзавы прызёр кантынентальнага першынства атрымала права выступіць на Еўрапейскім юнацкім алімпійскім фестывалі з 23 па 29 ліпеня.-0-
