24 мая, Мінск /Кар. БЕЛТА/. Беларускія тэнісісты Ілья Івашка і Уладзімір Ігнацік прайгралі ў матчах другога круга кваліфікацыі турніру серыі Вялікага шлема "Ралан Гарос" (прызавы фонд 36 млн еўра), паведамляе карэспандэнт БЕЛТА.
Ілья Івашка (119-ы ў рэйтынгу АТП) уступіў у двух сэтах першаму нумару пасеву ў кваліфікацыі Марыушу Копілу з Румыніі - 2:6, 2:6. У першым крузе беларус быў мацнейшы за бельгійца Кімера Копеянса (164) - 6:2, 6:2. Уладзімір Ігнацік (149) пасля перамогі над прадстаўніком Кітая Дзі Ву (217) - 6:1, 6:2 - прайграў сёння калумбійцу Сант'яга Хіральда (107) - 2:6, 4:6.
Завяршыла барацьбу ў кваліфікацыі да прэстыжнага турніру беларуска Вольга Гаварцова (142-і рэйтынг ВТА), якая ўступіла маладой саперніцы Кайле Дэй (148) з ЗША - 1:6, 3:6. Арына Сабаленка (115) у больш упартым паядынку не змагла перамагчы Іпек Сойлу (154) з Турцыі - 6:4, 1:6, 6:7 (3).
Без папярэдняга адбору ў асноўнай сетцы на грунтавых кортах "Ралан Гарос" згуляе беларуска Аляксандра Сасновіч (96), а таксама Максім Мірны, які выступіць у мужчынскім парным разрадзе разам з расійскім тэнісістам Міхаілам Южным.-0-