4 лістапада, Мінск /Кар. БЕЛТА/. Беларускія канькабежцы разлічваюць заваяваць ад дзвюх да пяці ліцэнзій на зімовую Алімпіяду ў Пхёнчхане. Аб гэтым расказаў галоўны трэнер зборнай Беларусі па канькабежным спорце Сяргей Мінін на сустрэчы з міністрам спорту і турызму Аляксандрам Шамко і кіраўніцтвам Беларускага саюза канькабежцаў, паведамілі БЕЛТА ў прэс-службе Мінспорту.
"Напярэдадні алімпійскага сезона праведзена насычаная падрыхтоўка. На спаборніцтвах Марынай Зуевай, Ігнатам Галавацюком і Віталем Міхайлавым былі ўстаноўлены тры нацыянальныя рэкорды. Беларускія канькабежцы разлічваюць заваяваць ад дзвюх да пяці ліцэнзій, што даюць права выступіць на Алімпіядзе", - адзначыў Сяргей Мінін.
Першыя рэзультаты сезона паказалі, што беларускія канькабежцы знаходзяцца ў добрай форме. Ігнат Галавацюк на завершаным чэмпіянаце Беларусі на асобных дыстанцыях перасягнуў нацыянальнае дасягненне і паказаў лепшы час катка на дыстанцыі 500 м - 35,33 сек. Таксама Ігнат абнавіў і самы высокі рэзультат канькабежнага стадыёна "Мінск-Арэны" ў забегу на 1000 м - 1 мін. 10,12 сек. У гонар гэтых падзей дасягненні канькабежца былі ўрачыста размешчаны на спецыяльнай дошцы рэкордаў стадыёна.
Міністр спорту і турызму падкрэсліў, што яму падабаецца настрой нацыянальнай каманды па канькабежным спорце. "У атлетаў ёсць дадатная дынаміка рэзультатаў, у зборнай падрастае добрая моладзь, наладжана сістэмная работа па падрыхтоўцы спартыўнага рэзерву. Мне вельмі імпануе, што ў саюзе канькабежцаў няма абыякавых людзей, усе настроены на старанную працу і пры гэтым праяўляюць разумную ініцыятыву і творчы падыход. Упэўнены, што гэта дасць свае вынікі", - расказаў Аляксандр Шамко.
Беларускіх канькабежцаў у стартуючым сезоне чакае адказны перыяд заваявання ліцэнзій на зімовыя Гульні. На наступным тыдні атлеты прымуць удзел у першых адборачных спаборніцтвах да Алімпіяды, на этапе Кубка свету з 8 па 13 лістапада ў Нідэрландах. Затым з 13 па 20 лістапада - у нарвежскім Ставангеры, з 30 лістапада па 4 снежня - у Калгары (Канада), з 4 па 11 снежня - у Солт-Лейк-Сіці (ЗША).
Асноўнымі кандыдатамі на пападанне ў Пхёнчхан сёння з'яўляюцца Марына Зуева, Віталь Міхайлаў, Ігнат Галавацюк, Таццяна Міхайлава і Максім Дубоўскі. XXIII зімовыя Алімпійскія гульні ў Пхёнчхане пройдуць з 9 па 25 лютага. У канькабежным спорце будзе разыграна 14 камплектаў узнагарод.-0-
