2 жніўня, Мінск /Кар. БЕЛТА/. Беларускі тэнісіст Ягор Герасімаў атрымаў другую перамогу на турніры ў мексіканскім Лос-Кабасе (прызавы фонд - $715 тыс.) і выйшаў у чвэрцьфінал, паведамляе карэспандэнт БЕЛТА.
У напружаным двухгадзінным паядынку другога раўнда Герасімаў, які знаходзіцца на 301-м месцы сусветнага рэйтынгу, абыграў сёння 28-ю ракетку планеты амерыканца Сэма Куэры - 7:5, 5:7, 7:6 (8:6). Наступным сапернікам Ягора будзе 4-ы нумар сусветнага рэйтынгу аргенцінец Хуан Марцін дэль Потра, пасеяны ў Лос-Кабасе пад першым нумарам. У стартавым матчы Ягор Герасімаў быў мацнейшы за аўстралійскага тэнісіста Бернарда Томіча (153-і нумар рэйтынгу АТР) - 6:4, 6:3.
На турніры ў аўстрыйскім Кітцбюэлі (прызавы фонд - 501 тыс. еўра) беларус Максім Мірны і аўстрыец Філіп Освальд у чвэрцьфінале парнага разраду сёння вечарам згуляюць з аргенцінска-італьянскім дуэтам Федэрыка Дэльбоніс / Даніэле Брачалі.-0-
