10 лістапада, Мінск /Кар. БЕЛТА/. Паядынкам другой ракеткі зборнай Беларусі Аляксандры Сасновіч і першага нумара каманды ЗША Како Вандэвеге стартуе фінальны матч розыгрышу Кубка Федэрацыі. Такі вынік жараб'ёўкі, якая адбылася сёння ў Мінскай гарадской ратушы, перадае карэспандэнт БЕЛТА.
У суботу, 11 лістапада, першая адзіночная гульня пачнецца на корце "Чыжоўка-Арэны" ў 14.30. Хутка пасля яе завяршэння на пляцоўку выйдуць першы нумар гаспадароў Арына Сабаленка і амерыканка Слоан Стывенс.
У другі дзень спаборніцтваў 12 лістапада ў 13.30 стартуе паядынак першых нумароў абедзвюх дружын Арыны Сабаленка і Како Вандэвеге. Услед за імі згуляюць Аляксандра Сасновіч і Слоан Стывенс, а затым адбудзецца парны матч паміж беларускім тандэмам Вера Лапко / Лідзія Марозава і амерыканскім дуэтам Шэлбі Роджэрс / Элісан Рыске.
Па рэгламенце Кубка Федэрацыі, перад другім гульнявым днём капітаны каманд Эдуард Дуброў і Кэці Рыналдзі маюць права правесці замены.
Раней у розыгрышы Кубка Федэрацыі, які лічыцца неафіцыйным камандным чэмпіянатам свету, тэнісісткі зборных Беларусі і ЗША сустракаліся паміж сабой толькі аднойчы: у лютым 2012 года амерыканкі перамаглі на сваёй арэне з лікам 5:0.
Зборная Беларусі ўпершыню прабілася ў фінал, а каманда ЗША 17 разоў станавілася пераможцай Кубка Федэрацыі. Апошні раз амерыканкі выйгралі трафей 17 гадоў таму, а двойчы запар у 2009 і 2010 гадах уступалі ў вырашальных сустрэчах італьянскім тэнісісткам.
На шляху да цяперашняга фіналу беларускія тэнісісткі па чарзе перамаглі ў Мінску саперніц з Нідэрландаў (4:1) і Швейцарыі (3:2), а амерыканкі таксама дома абыгралі зборныя Германіі (4:0) і Чэхіі (3:2). Цяпер у камандным рэйтынгу жаночых зборных Беларусь займае другую пазіцыю, ЗША знаходзяцца на трэцім месцы, а наперадзе каманда Чэхіі.-0-
