31 кастрычніка, Мінск /Кар. БЕЛТА/. Футбольны клуб БАТЭ прыняў рашэнне падаць іск адносна балельшчыка, які 28 верасня выбег на поле "Барысаў-Арэны" ў час матчу Лігі Еўропы з лонданскім "Арсеналам", паведамілі БЕЛТА ў прэс-службе барысаўскай каманды.
За гэты інцыдэнт БАТЭ быў аштрафаваны УЕФА на 5 тыс. еўра. Штраф быў выплачаны клубам у поўным аб'ёме, але цяпер БАТЭ прыняў рашэнне падаць рэгрэсны іск на парушальніка грамадскага парадку, каб спагнаць вышэйназваную суму. У БАТЭ падкрэсліваюць, што вяртанне сродкаў у клубны бюджэт ні ў якім разе не з'яўляецца прычынай падачы іску. У выпадку, калі іск будзе задаволены, уся сума пойдзе на дабрачыннасць.
ФК БАТЭ хоча такім чынам нагадаць усім балельшчыкам аб недапушчальнасці такіх паводзін на стадыёне і паказаць, што ў клуба ёсць прававыя механізмы, каб адрасна прыцягнуць да адказнасці парушальнікаў грамадскага парадку.-0-