6 мая, Мінск /Кар. БЕЛТА/. Баскетбалісты "Гродна-93" сталі першымі фіналістамі чэмпіянату Беларусі сярод мужчынскіх каманд, паведамляе карэспандэнт БЕЛТА.
У вырашальным, пятым па ліку матчы паўфінальнай серыі супраць магілёўскага "Барысфена" падапечныя Андрэя Васілеўкі абыгралі сапернікаў на іх пляцоўцы з лікам 98:83. Канчатковы рэзультат напружанага процістаяння - 3-2 на карысць гродзенскай дружыны.
Сапернікам "Гродна-93" у вырашальных сустрэчах за залатыя медалі хутчэй за ўсё будуць дзеючыя чэмпіёны краіны баскетбалісты "Цмокі-Мінск". Яны лідзіруюць у паўфінальнай серыі з віцебскім "Рубонам" і сёння на сваёй арэне правядуць трэці паядынак за выхад у фінал. Мінскія "цмокі" выйгравалі нацыянальнае першынство 8 разоў запар, у актыве гродзенскай каманды столькі ж чэмпіёнскіх тытулаў, апошні з якіх заваяваны ў 2004 годзе.
Мінскія "Цмокі" далучыліся да ўдзелу ў чэмпіянаце Беларусі з паўфінальнай стадыі, да гэтага каманда Аляксандра Круцікава гуляла ў Адзінай лізе ВТБ, заняўшы 12-е месца сярод 13 каманд. У "банкаўскім" турніры ўжо ідзе чвэрцьфінальная стадыя. Піцерскі "Зеніт" за крок ад выхаду ў паўфінал, двойчы абыграўшы на сваёй пляцоўцы рыжскі ВЭФ - 93:81 і 79:71. У астатніх серыях да трох перамог лік пакуль 1-0: падмаскоўныя "Хімкі" выйгралі першы матч у краснаярскага "Енісея" 91:84, лідар рэгулярнага сезона маскоўскі ЦСКА абыграў "Астану" - 77:54, краснадарскі "Лакаматыў-Кубань" у сябе дома ўступіў казанскаму УНІКСу з лікам 62:71. Беларускі цэнтравы казанцаў Арцём Парахоўскі набраў у гульні з краснадарцамі 11 ачкоў.-0-