6 сакавіка, Мінск /Кар. БЕЛТА/. У Мінскай гарадской ратушы адбылася жараб'ёўка групавога этапу баскетбольнага чэмпіянату свету сярод дзяўчат (U-17), які пройдзе гэтым летам у Мінску, перадае карэспандэнт БЕЛТА.
Баскетбалісткі Беларусі, якія рыхтуюцца да турніру пад кіраўніцтвам Вікторыі Дацук і Валянціны Навойчык, на першым этапе будуць гуляць у групе А разам з равесніцамі з Францыі, Японіі і Калумбіі.
Склады астатніх папярэдніх квартэтаў:
В - ЗША, Італія, Кітай, Малі.
С - Венгрыя, Іспанія, Аргенціна, Новая Зеландыя.
D - Аўстралія, Латвія, Канада, Ангола.
Пасля завяршэння групавога этапу ўсе каманды падзеляцца на пары і пачнуць барацьбу ў плэй-оф са стадыі 1/8 фіналу.
Беларуская сталіца атрымала права прыняць спаборніцтвы будучых баскетбольных зорак на кангрэсе Міжнароднай федэрацыі баскетбола ў маі 2017 года. Матчы пройдуць з 21 па 29 ліпеня на пляцоўках мінскага Палаца спорту і "Фалькон Клуба".
Планетарны чэмпіянат для 17-гадовых баскетбалістак будзе праведзены пяты раз. У трох стартавых турнірах чэмпіёнкамі нязменна станавіліся спартсменкі ЗША (2010, 2012, 2014), а на папярэднім сусветным першынстве, якое праходзіла два гады таму на арэнах Іспаніі, трыумфатарамі сталі баскетбалісткі Аўстраліі, якія абыгралі ў вырашальным паядынку каманду Італіі (62:38), у барацьбе за бронзу амерыканкі былі мацнейшыя за кітаянак (65:50).-0-
Фота Андрэя Пакумейкі
