11 студзеня, Мінск /Кар. БЕЛТА/. Беларуская тэнісістка Арына Сабаленка (69-ы нумар сусветнага рэйтынгу) не змагла прайсці ў паўфінал на турніры ў аўстралійскім Хобарце, паведамляе карэспандэнт БЕЛТА.
У сённяшнім чвэрцьфінальным паядынку Арына сустракалася з украінкай Лесяй Цурэнка, якая займае 43-е месца ў рэйтынгу WTA і ўсяго за гадзіну ўступіла ў двух сэтах з аднолькавым лікам 1:6. Цяпер у барацьбе за выхад у фінал Цурэнка згуляе з пераможцай матчу паміж румынкай Міхаэлай Бузарнеску (57) і амерыканкай Элісан Рыск (89). У матчы 1/16 фіналу Арына перамагла канадскую тэнісістку Эжэн Бушар (83), а потым была мацнейшай за кітаянку Чжан Шуай (35).
Сёння Арына Сабаленка яшчэ раз выйдзе на корт - у гульні 1/4 фіналу парнага разраду яна разам з расійскай тэнісісткай Веранікай Кудзярметавай сустрэнецца з румынска-ўкраінскім дуэтам Ралука Алару / Вольга Саўчук.
У Мельбурне яшчэ адна беларуская тэнісістка Вера Лапко (135) у стартавым крузе кваліфікацыі адкрытага чэмпіянату Аўстраліі ўпэўнена перайграла румынку Аляксандру Каданцу (171) - 6:3, 6:1. Наступнай саперніцай Веры будзе швейцарская тэнісістка Штэфані Фегеле (144). Каб трапіць у лік 128 удзельніц асноўнай сеткі трэба перамагчы ў трох кваліфікацыйных раўндах.
Раней у першым крузе кваліфікацыі мужчынскага адзіночнага разраду Australian Open паражэнне пацярпелі беларусы Уладзімір Ігнацік (145) і Ілья Івашка (210).-0-