17 студзеня, Мінск /Кар. БЕЛТА/. Аляксандр Глеб прыме ўдзел у жараб'ёўцы Лігі нацый УЕФА, якая 24 студзеня пройдзе ў Лазане (Швейцарыя). Гэту інфармацыю карэспандэнту БЕЛТА пацвердзіў знакаміты беларускі ігрок.
У новым турніры для нацыянальных зборных па футболе будуць разыгрывацца дадатковыя пуцёўкі на чэмпіянат Еўропы.
У Лізе нацый выступяць 55 еўрапейскіх зборных, якія будуць падзелены на чатыры дывізіёны (A, B, C і D). У кожным дывізіёне будзе па чатыры групы, у іх - па 4 каманды. Склад дывізіёнаў сфарміраваны зыходзячы са становішчаў каманд у рэйтынгу нацыянальных зборных УЕФА.
Зборная Беларусі згуляе ў дывізіёне D разам з сапернікамі з Азербайджана, Арменіі, Македоніі, Грузіі, Фарэрскіх астравоў, Латвіі, Люксембурга, Казахстана, Малдовы, Ліхтэнштэйна, Мальты, Косава, Андоры, Сан-Марына і Гібралтара.
Жараб'ёўка першага этапу Лігі нацый пройдзе ў цэнтры SwissTech Convention у Лазане.-0-
