17 сакавіка, Мінск /Аліна Грышкевіч - БЕЛТА/. Урачыстая цырымонія ўзнагароджання пераможцаў рэспубліканскага конкурсу "Жанчына года - 2016" пройдзе ў Мінску 18 сакавіка, паведамілі карэспандэнту БЕЛТА ў Беларускім саюзе жанчын.
У конкурсе шэсць намінацый, якія перыядычна мяняюцца. Так, на гэты раз з улікам правядзення Года навукі ўведзена намінацыя "Жанчына ў навуцы". Таксама назавуць імёны найбольш паспяховых жанчын у намінацыях "За лідарства і паспяховае кіраўніцтва", "За выхаванне дзяцей і моладзі", "За ўклад у развіццё духоўнасці і культуры", "За ўклад у развіццё вёскі", "Паспяховы старт і надзея Беларускага саюза жанчын".
Асноўныя крытэрыі для ўдзелу ў конкурсе - дасягненні ў прафесійнай і грамадскай дзейнасці, выхаванні дзяцей і моладзі, уклад у развіццё вёскі, духоўнасці і культуры, навукі. У конкурсе прынялі ўдзел прадстаўніцы розных рэгіёнаў краіны.
Конкурс праводзіцца дзявяты раз. Яго асноўная задача - адлюстраваць высокую ролю жанчын у сучасным грамадстве, іх уклад ва ўмацаванне сям'і, а таксама сацыяльна-эканамічнае развіццё Беларусі. У мерапрыемстве прымуць удзел прадстаўнікі рэспубліканскіх органаў улады, кіраўнікі прадпрыемстваў, арганізацый і ўстаноў.-0-
