7 жніўня, Мінск /Кар. БЕЛТА/. За бязлітаснае абыходжанне з жывёламі ў Беларусі ў I паўгоддзі ўзбуджана 11 крымінальных спраў, паведаміла афіцыйны прадстаўнік Следчага камітэта Юлія Ганчарова ў праграме "Прычыны і следства" на "Альфа Радыё", паведамляе БЕЛТА.
Больш за ўсё такіх злачынстваў (пяць) учынена ў Мінскай вобласці, тры злачынствы адзначаліся ў Гомельскай вобласці, па адным - у Гродзенскай, Магілёўскай абласцях і Мінску. З 11 крымінальных спраў па пяці вядзенне па справе прыпынена, паколькі немагчыма ўстанавіць віноўніка.
Адзін з рэзанансных выпадкаў здарыўся ў маі ў Калінкавіцкім раёне, дзе непаўналетні расстрэльваў з паляўнічай стрэльбы сабак цераз агароджу, прычыніўшы ім калецтвы. "Фактычна 17-гадовы падлетак на працягу двух тыдняў страляў па жывёлах. У аддзел унутраных спраў паступіла паведамленне аб стральбе, на месца прыбыла следча-аператыўная група, малады чалавек прымяніў насілле ў адносінах да оперупаўнаважанага, які знаходзіўся пры выкананні службовых абавязкаў, нанёс яму некалькі ўдараў па твары. Расследаванне завершана, маладому чалавеку прад'яўлена абвінавачанне па шэрагу артыкулаў, у тым ліку па артыкуле "Жорсткае абыходжанне з жывёламі". Падлетак узяты пад варту, нягледзячы на юны ўзрост. Справа перададзена пракурору для накіравання ў суд", - расказала Юлія Ганчарова.
Хуліган раней прыцягваўся ўжо да адказнасці за крадзеж, раскраданне і захоўванне агнястрэльнай зброі. Тады ён быў прыгавораны да аднаго года абмежавання волі без накіравання ў папраўчую ўстанову.
Таксама Юлія Ганчарова паведаміла пра падрабязнасці інцыдэнту, які здарыўся ў чэрвені мінулага года ў Клецкім раёне. У двары дома п'яны 61-гадовы мужчына кінуў у калодзеж сабаку адной з жыхарак вёскі. Жывёліна загінула. Абвінавачаны віну прызнаў поўнасцю, а свае паводзіны растлумачыў тым, што раззлаваўся на сабаку, які душыў кураня.
У 2015 годзе ў Крымінальным кодэксе Беларусі з'явіўся артыкул, які прадугледжвае пакаранне за бязлітаснае абыходжанне з жывёламі. Так, жорсткае абыходжанне з жывёлінай, што прывяло да яе гібелі або калецтва, учыненае з хуліганскага, карыслівага або іншага нізкага намеру або ў прысутнасці заведама малалетняга, вядзе да пакарання ў выглядзе прыцягнення да грамадскіх работ, накладання штрафу, або прыцягнення да папраўчых работ на тэрмін да аднаго года, або арышту. За аналагічнае правапарушэнне, учыненае паўторна або групай асоб, прымяняецца пакаранне ў выглядзе арышту, абмежавання волі на тэрмін да аднаго года або пазбаўленнем волі на той жа тэрмін. За катаванне жывёл прадугледжана адміністрацыйная адказнасць.-0-
