11 снежня, Мінск /Кар. БЕЛТА/. Няўстойлівы характар надвор'я з павышаным тэмпературным рэжымам чакаецца ў Беларусі на бягучым тыдні, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"Ужо ў бліжэйшыя суткі на тэрыторыю Беларусі пачне паступаць вельмі цёплае паветра з паўднёвага захаду Еўропы, чакаецца адліга, і выпаўшы снег амаль поўнасцю растае", - расказалі ў Гідрамеце.
У аўторак, 12 снежня, чакаецца вельмі цёплае для зімовага часу надвор'е. Гэта будзе самы цёплы дзень на бягучым тыдні. Тэмпература паветра ўначы складзе ад мінус 4 да плюс 2 градусаў, у другой палавіне дня - 2-8 градусаў цяпла. Па паўднёвым захадзе краіны будзе яшчэ цяплей: уначы - 3-5 градусаў вышэй за нуль, удзень - плюс 9-11 градусаў. У асобных раёнах краіны пройдуць кароткачасовыя ападкі (дождж, уначы з мокрым снегам). Уначы і раніцай чакаецца слабы галалёд. На асобных участках дарог магчыма галалёдзіца. Вецер прагназуецца паўднёва-заходні парывісты.
У сераду, 13 снежня, уначы ў асобных раёнах, удзень пераважна па паўднёвым усходзе краіны чакаюцца ападкі (дождж, мокры снег). Месцамі магчымы слабы туман і галалёд. На асобных участках дарог галалёдзіца. Уначы захаваецца парывісты вецер. Тэмпература паветра ўначы складзе ад мінус 2 да плюс 4 градусаў, удзень - ад нуля да плюс 5.
У чацвер, 14 снежня, атмасферныя франты абумовяць уначы па паўднёвым усходзе краіны, удзень на большай частцы тэрыторыі кароткачасовыя ападкі (мокры снег, дождж). Месцамі чакаюцца слабыя туман і галалёд. На дарогах месцамі ўтворыцца галалёдзіца. Тэмпература паветра ўначы панізіцца да 1-7 градусаў марозу, удзень будзе ад мінус 3 да плюс 3 градусаў.
У пятніцу, 15 снежня, захаваецца няўстойлівае надвор'е, на большай частцы тэрыторыі краіны пройдуць кароткачасовыя ападкі (мокры снег, дождж), чакаюцца слабы туман і галалёд. Уначы на асобных участках дарог магчыма галалёдзіца. Днём ападкі будуць суправаджацца парывістым ветрам. Тэмпература паветра ўначы складзе ад мінус 3 да плюс 2 градусаў. Удзень будзе ў асноўным ад мінус 1 да плюс 4 градусаў, па паўднёвым захадзе тэмпература павысіцца да 6 градусаў цяпла.-0-
