17 мая, Мінск /Кар. БЕЛТА/. Веды вучоных вельмі важныя для вырашэння важнейшых пытанняў развіцця краіны і грамадства. Аб гэтым заявіў сёння старшыня рэспубліканскага грамадскага аб'яднання "Белая Русь" Аляксандр Радзькоў на семінары "Філасофскія і сацыяльна-палітычныя асновы дзейнасці грамадскіх фарміраванняў у Рэспубліцы Беларусь", перадае карэспандэнт БЕЛТА.
"Мы ўсе хочам, каб наша краіна квітнела. Разгляд перспектыў развіцця грамадзянскай супольнасці немагчымы без аналізу гісторыі. Свет змяняецца, яго трэба асэнсоўваць, і вучоныя нам у гэтым дапамогуць", - падкрэсліў Аляксандр Радзькоў.
Ён звярнуў увагу на тое, што супрацоўніцтва "Белай Русі" і НАН узаемавыгадна. "Калі мы сталі думаць аб тым, як развівацца грамадскаму аб'яднанню, то зразумелі, што без ведаў вучоных не абыдземся. Часам шукаем выйсце з нейкай сітуацыі, а ў гісторыі ўжо такое было, і падказкі там ёсць. І мы таксама патрэбны НАН Беларусі, таму што мы - гэта аўдыторыя", - падкрэсліў старшыня.
Кажучы пра функцыі грамадскага аб'яднання, Аляксандр Радзькоў адзначыў, што ўдзел у "Белай Русі" - гэта добрая магчымасць набыць палітычны вопыт у выбарчых кампаніях, паўсядзённым жыцці, дэпутацкай рабоце, а таксама атрымаць вопыт у рабоце з людзьмі. "Гэта вельмі важна - зразумець, ці пойдуць за табой людзі", - сказаў ён.
У навукова-практычным семінары "Філасофскія і сацыяльна-палітычныя асновы дзейнасці грамадскіх фарміраванняў у Рэспубліцы Беларусь" прымаюць удзел вядучыя вучоныя краіны, прадстаўнікі грамадзянскай супольнасці і СМІ.-0-