6 снежня, Мінск /Кар. БЕЛТА/. Усім супрацоўнікам Беларускай АЭС прадастаўляецца жыллё ў перыяд работы на станцыі, паведаміў намеснік начальніка вучэбна-трэніровачнага цэнтра Беларускай АЭС Аляксандр Ерын сёння ў час анлайн-канферэнцыі на сайце БЕЛТА.
"Усе работнікі забяспечваюцца жыллём у залежнасці ад складу сям'і, пытанні прадастаўлення жылля разглядаюцца на нарадзе жыллёвай камісіі АЭС", - расказаў Аляксандр Ерын.
Сацыяльныя гарантыі і кампенсацыі ўстаноўлены калектыўным дагаворам АЭС. Напрыклад, работнікам АЭС прадастаўляецца аплатны водпуск, выплачваецца матэрыяльная дапамога ў памеры да двух службовых акладаў, робяцца аднаразовыя выплаты да Дня энергетыка, юбілеяў супрацоўнікаў прадпрыемства, у сувязі з непрадбачанымі матэрыяльнымі цяжкасцямі і г.д.
Прарэктар па вучэбнай рабоце БДУІР Алена Жывіцкая расказала, што магчымасць адразу ж вырашыць жыллёвае пытанне з'яўляецца адной з прычын, чаму студэнты імкнуцца добра вучыцца, каб потым прэтэндаваць на работу на Беларускай АЭС. "Гэта, вядома, выдатная матывацыя для нашых маладых спецыялістаў і выпускнікоў. Не ведаю, якое яшчэ з прадпрыемстваў можа адразу ж забяспечыць жыллём выпускнікоў ВНУ. Плюс добрая зарплата", - адзначыла Алена Жывіцкая.
Гэта пацвердзіў і загадчык кафедры "Цеплавыя электрычныя станцыі" БНТУ Мікалай Карніцкі: "Нашым студэнтам, якія размяркоўваліся на БелАЭС, адразу прадастаўлялі кватэры. Тым, хто ехаў з сям'ёй і дзецьмі, прадастаўлялі двух-, трохпакаёвыя. Яны вельмі задаволены. У Мінску такіх умоў няма. І важна, што гэта менавіта новыя дамы. Плата за арэнднае жыллё мінімальная".-0-