28 верасня, Мінск /Кар. БЕЛТА/. У Мінску да канца бягучага тыдня ацяпленне ўключаць не будуць зыходзячы са спрыяльнага прагнозу надвор'я. Аб гэтым паведаміў на прэс-канферэнцыі начальнік аддзела энергетыкі ўпраўлення гарадской гаспадаркі і энергетыкі Мінгарвыканкама Дзмітрый Плашкоў, перадае карэспандэнт БЕЛТА.
Да пытання аб пачатку ацяпляльнага сезона Мінгарвыканкам вернецца на наступным тыдні.
Уключэнне сістэм ацяплення праводзіцца ў сталіцы паэтапна. На першым этапе - калі сярэдняя тэмпература паветра за 5 сутак запар складае плюс 10 градусаў і менш - цяпло пачне паступаць у школы і дзіцячыя сады, бальніцы, іншыя медыцынскія і сацыяльныя ўстановы Мінска. На другім этапе - пры сярэдняй тэмпературы плюс 8 градусаў і меншай на працягу 5 сутак - да ацяплення падключаюць жылыя дамы, гасцініцы, інтэрнаты. Трэці этап - падключэнне да цяпла адміністрацыйных будынкаў, вытворчых памяшканняў, яно праводзіцца пасля таго, як завершыцца ўключэнне сістэм ацяплення ў жылым сектары.-0-