3 жніўня, Мінск /Кар. БЕЛТА/. У беларускія школы 1 верасня прыйдуць больш за 100 тыс. першакласнікаў. Нараду па падрыхтоўцы ўстаноў адукацыі да пачатку 2018/2019 навучальнага года правёў намеснік прэм'ер-міністра Васіль Жарко, паведамілі БЕЛТА ў прэс-службе ўрада.
У 2018/2019 навучальным годзе ў краіне будзе працаваць каля 8 тыс. устаноў адукацыі, у якіх будуць навучацца каля 2 млн выхаванцаў, вучняў, студэнтаў і слухачоў.
На нарадзе ва ўрадзе разглядалася падрыхтоўка да пачатку новага навучальнага года ўстаноў усіх узроўняў: дашкольнай, агульнай сярэдняй, прафесійна-тэхнічнай, сярэдняй спецыяльнай і вышэйшай адукацыі.
Кіраўнікам дзяржорганаў пастаўлены задачы па ўмацаванні матэрыяльна-тэхнічнай базы ўстаноў, завяршэнні рамонтаў, куплі абсталявання і інвентару, мадэрнізацыі харчаблокаў, укамплектаванні педагагічнымі кадрамі, выданні падручнікаў і дапаможнікаў. Звернута ўвага на падрыхтоўку інтэрнатаў устаноў адукацыі.
Васіль Жарко адзначыў, што падрыхтоўка павінна завяршыцца своечасова і да 1 верасня ў кожнай установе адукацыі павінны быць створаны бяспечныя і камфортныя ўмовы для навучэнцаў.
На нарадзе асаблівая ўвага ўдзелена арганізацыі харчавання, забеспячэнню бяспекі навучэнцаў ва ўстановах адукацыі, аказанню падтрымкі ў падрыхтоўцы да школы дзецям з малазабяспечаных сем'яў, арганізацыі школьных базараў, даступнасці і разнастайнасці адзення для школьнікаў.-0-
