Сцяг Пятніца, 29 сакавіка 2024
Усе навіны
Усе навіны
Грамадства
30 мая 2016, 10:05

У Беларусі сёння прагучыць апошні школьны званок для 9-х і 11-х класаў

30 мая, Мінск /Кар. БЕЛТА/. Навучальны год у Беларусі завяршаецца 31 мая 2016 года, апошнія званкі для навучэнцаў 9-х і 11-х класаў устаноў адукацыі прагучаць 30 мая, паведаміла карэспандэнту БЕЛТА прэс-сакратар Міністэрства адукацыі Юлія Барадун.

Сёння ва ўсіх школах Беларусі пройдуць урачыстыя мерапрыемствы. Гэты дзень кожная навучальная ўстанова адзначае па-свойму, але нязменнымі яго атрыбутамі з'яўляюцца кветкі, наказы старэйшых і развітальны школьны званок.

Выпускныя экзамены пасля завяршэння навучання і выхавання на II і III ступенях агульнай сярэдняй адукацыі пройдуць у перыяд з 1 па 11 чэрвеня. Экзамены па навучальных прадметах у пісьмовай форме будуць пачынацца ў 9 гадзін. У 2016 годзе акрамя аб'яўлення па тэлебачанні і радыё тэксты і заданні будуць размешчаны на партале Міністэрства адукацыі (edu.gov.by).

Дзевяцікласнікі будуць здаваць тры выпускныя экзамены: абедзве дзяржаўныя мовы (беларускую і рускую) і матэматыку. Усе экзамены - у пісьмовай форме. Па мовах яны напішуць дыктант, па матэматыцы - кантрольную работу. Выпускнікі 11 класа здадуць 4 экзамены: адну дзяржаўную мову на выбар (у форме пераказу), матэматыку (кантрольная работа), замежную мову і гісторыю Беларусі (у вуснай форме).

У 2015/2016 навучальным годзе ў рэспубліцы працавала больш за 3 тыс. устаноў агульнай сярэдняй адукацыі, у якіх навучаліся звыш 950 тыс. чалавек. Для навучэнцаў 1-8 класа навучальны год завяршаецца 31 мая, з 1 чэрвеня пачынаюцца канікулы. Навучэнцы 10-х класаў адправяцца на канікулы пасля таго, як яны пройдуць вучэбна-палявыя зборы (юнакі) або медпрактыку (дзяўчаты) на працягу пяці дзён, прадугледжаных тыпавым вучэбным планам і вучэбнай праграмай па прадмеце "Дапрызыўная медыцынская падрыхтоўка".

У гэтым годзе ў школах навучаліся 90,7 тыс. дзевяцікласнікаў і 57,4 тыс. адзінаццацікласнікаў.-0-

Падпісвайцеся на нас у
Twitter
Топ-навіны
Свежыя навіны Беларусі