7 кастрычніка, Мінск /Кар. БЕЛТА/. Амаль 500 тыс. беларускіх дзяцей атрымліваюць дзяржаўныя дапамогі. Аб гэтым паведаміў намеснік міністра працы і сацыяльнай абароны Валерый Кавалькоў сёння на прэс-канферэнцыі ў Мінску, перадае карэспандэнт БЕЛТА.
"Пастаянна ўдасканальваецца сістэма дзяржаўных дапамог. Сёння ў сувязі з нараджэннем у сям'і дзіцяці назначаецца да 11 відаў дапамог. Гэта разгалінаваная сетка выплат, яна ўключае ў тым ліку і сацыяльна слабаабароненыя катэгорыі сем'яў. Амаль 500 тыс. дзяцей атрымліваюць дапамогі, гэта кожны трэці ў краіне", - сказаў Валерый Кавалькоў.
Акрамя грашовых выплат, сем'ям могуць прапанаваць падтрымку ў выглядзе прадуктаў. Напрыклад, калі сям'я з'яўляецца малазабяспечанай, то для дзіцяці ва ўзросце да двух гадоў прапануюць бясплатнае дзіцячае харчаванне. "За 6 месяцаў бягучага года бясплатным харчаваннем было забяспечана практычна 15 тыс. дзяцей. Пры гэтым больш за 4 тыс. дзяцей атрымалі падтрымку незалежна ад узроўню даходу сям'і - яны нарадзіліся двайнятамі і трайнятамі", - удакладніў намеснік міністра.
Прадугледжаны і розныя сацыяльныя паслугі. Сем'ям могуць аказваць кансультацыйныя, прававыя, сацыяльна-псіхалагічныя, сацыяльна-пасрэдніцкія паслугі. Арганізавана работа клубаў і гурткоў для фарміравання гарманічных унутрысямейных адносін і падтрымкі сем'яў.
У прыватнасці, сем'і, у якіх выхоўваецца дзіця-інвалід, могуць скарыстацца паслугай сацыяльнай перадышкі. Гэта значыць на 28 дзён у год уладкаваць дзіця ў дом-інтэрнат і ў гэты час вырашыць свае сацыяльна-бытавыя праблемы. "На момант уладкавання дзіцяці ў інтэрнат выплата ўсіх дапамог захоўваецца, сям'я не нясе ніякіх матэрыяльных затрат. У першым паўгоддзі бягучага года перадышкай скарысталіся 38 сем'яў", - сказаў на заканчэнне Валерый Кавалькоў.-0-
