11 студзеня, Мінск /Алена Прус - БЕЛТА/. У Беларусі 25,4 працэнта атрымальнікаў пенсій прадаўжаюць працаваць - кожны чацвёрты пенсіянер, паведаміла карэспандэнту БЕЛТА намеснік начальніка галоўнага ўпраўлення пенсійнага забеспячэння Міністэрства працы і сацыяльнай абароны Ларыса Яшкова.
За год павялічылася і колькасць працуючых пенсіянераў, і іх удзельная вага. Так, на 1 студзеня 2017 года прадаўжалі працоўную дзейнасць 665,8 тыс. пенсіянераў, або 25,4 працэнта (год таму было 651,2 тыс., або 25,1 працэнта). Дарэчы, доля працуючых пенсіянераў вагаецца ў залежнасці ад сезона: як правіла, летам гэты паказчык ніжэйшы, а зімой - вышэйшы.
Прадстаўнік Мінпрацы і сацабароны канстатавала, што нацыянальным заканадаўствам устаноўлена абмежаванне ў выплаце пенсій толькі для тых, хто меў высокую заработную плату ў мінулым і чый індывідуальны каэфіцыент заработку перавышае 1,3. Рэальна пенсійныя выплаты абмяжоўваюцца нязначна: большасць працуючых пенсіянераў атрымліваюць пенсіі без выключэнняў.
Пытанне аб змяненні парадку выплаты пенсій працуючым пенсіянерам цяпер не разглядаецца, падкрэсліла яна.
Ларыса Яшкова адзначыла, што прадстаўніц прыгожага полу сярод працуючых пенсіянераў у два разы больш, чым прадстаўнікоў моцнай палавіны (451,5 тыс. жанчын і 214,2 тыс. мужчын).
Што датычыцца полаўзроставай структуры працуючых атрымальнікаў працоўных пенсій, то на 1 студзеня бягучага года ў рэспубліцы было 52,1 тыс. жанчын і 27,5 тыс. мужчын ва ўзросце да 55 гадоў; 218,7 тыс. жанчын і 32,8 тыс. мужчын ва ўзросце 55-59 гадоў. Ва ўзроставай кагорце атрымальнікаў пенсій 60-64 гады працуючых жанчын было 111,7 тыс., мужчын - 96,5 тыс. Прадоўжылі працаваць 52,3 тыс. жанчын і 42,4 тыс. мужчын ва ўзросце 65-69 гадоў. У ліку пенсіянераў, якія прадаўжаюць працаваць, - 15,1 тыс. жанчын і 12,4 тыс. мужчын ва ўзросце 70-79 гадоў. Лічацца працуючымі 492 жанчыны і 599 мужчын ва ўзросце 80-89 гадоў, а таксама 10 жанчын і 12 мужчын, якія перасягнулі 90-гадовы рубеж.
Паводле статыстычных даных, на 1 студзеня бягучага года агульная колькасць атрымальнікаў пенсій у органах па працы, занятасцi i сацыяльнай абароне дасягнула 2 619,3 тыс. чалавек, у тым ліку 2 552,6 тыс. жыхароў краіны атрымліваюць працоўныя пенсіі.
Як паведамлялася БЕЛТА раней, у пенсійную сістэму Беларусі ў 2016 годзе ўліліся амаль 133,3 тыс. чалавек. Сярод тых, хто ў мінулым годзе атрымаў статус пенсіянера, - 75,8 тыс. жанчын і 57,5 тыс. мужчын. Пенсія па льготных падставах назначана практычна кожнаму дзясятаму новаму пенсіянеру.-0-
