26 мая, Мінск /Юлія Огнева - БЕЛТА/. Цёплае надвор'е з навальніцамі чакаецца ў Беларусі ў бліжэйшыя выхадныя, паведаміла карэспандэнту БЕЛТА галоўны сіноптык Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Святлана Рыбакова.
"Апошнія майскія дні парадуюць жыхароў Беларусі па-летняму цёплым надвор'ем. Але не абыдзецца без навальнічных дажджоў", - адзначыла Святлана Рыбакова.
У пятніцу, 27 мая, умовы надвор'я на тэрыторыі Беларусі будзе вызначаць цёплая няўстойлівая паветраная маса. Чакаецца камфортнае надвор'е, ноччу пераважна без ападкаў. Днём месцамі пройдуць кароткачасовыя дажджы, прагрымяць навальніцы. Вецер будзе няўстойлівы слабы, пры навальніцах парывісты. Тэмпература паветра ноччу складзе ад плюс 6 да 12 градусаў, днём - 20-25 градусаў цяпла, па Брэсцкай і Гомельскай абласцях паветра прагрэецца да 27 вышэй за нуль.
"У выхадныя дні на тэрыторыю краіны прадоўжаць паступаць цёплыя, але больш вільготныя паветраныя масы з поўдня Еўропы. Ноччу дажджоў няшмат, а вось у дзённыя гадзіны за кошт развіцця канвекцыйнай воблачнасці ападкаў будзе больш, пры гэтым яны будуць суправаджацца навальніцамі, месцамі з парывістым ветрам", - расказала Святлана Рыбакова. У суботу, 28 мая, ноччу месцамі, днём на большай частцы тэрыторыі пройдуць кароткачасовыя навальнічныя дажджы. Вецер паўночна-ўсходні ўмераны, пры навальніцах парывісты. Тэмпература паветра ноччу складзе ад 8 да 14 градусаў цяпла, днём будзе да плюс 21 градуса па поўначы і да плюс 28 градусаў па поўдні краіны. У нядзелю, 29 мая, ноччу месцамі, днём на большай частцы тэрыторыі пройдуць кароткачасовыя дажджы з навальніцамі. Тэмпература паветра ноччу складзе 11-16 градусаў цяпла, днём будзе ад 21 да 28 градусаў са знакам плюс.
Паводле слоў Святланы Рыбаковай, у пачатку наступнага тыдня істотных змяненняў у надвор'і не чакаецца. У панядзелак-аўторак ноччу месцамі, днём на большай частцы тэрыторыі пройдуць кароткачасовыя дажджы. У асобных раёнах прагрымяць навальніцы. Тэмпература паветра ноччу складзе 11-17 градусаў цяпла, днём будзе ад 21 да 27 градусаў са знакам плюс, месцамі паветра прагрэецца да 29 вышэй за нуль.-0-
