9 красавіка, Мінск /Кар. БЕЛТА/. Цёплае надвор'е і ў асноўным без дажджоў чакаецца ў Беларусі на гэтым тыдні, паведамілі карэспандэнту БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.
"На гэтым тыдні будзе пераважаць антыцыкланальны характар надвор'я, таму дажджоў будзе няшмат. Пачатак тыдня будзе вельмі цёплым, але ў сярэдзіне тыдня пахаладае. Зрэшты, тэмпературны фон усё роўна застанецца крыху вышэйшым за кліматычную норму, толькі па поўначы краіны - каля нормы", - сказалі ў Белгідрамеце.
У аўторак, 10 красавіка, надвор'е ў асноўным будзе вызначаць вобласць павышанага ціску, толькі па поўначы краіны будзе адчувацца ўплыў франтальнага раздзелу. Чакаецца вельмі цёплае надвор'е. Уначы па паўночным захадзе, удзень пераважна ў паўднёва-ўсходніх раёнах пройдуць кароткачасовыя дажджы, магчымы навальніцы, на астатняй тэрыторыі будзе пераважна без ападкаў. Тэмпература паветра ўначы складзе 6-11 градусаў вышэй за нуль. Удзень - 15-21 градус цяпла, па паўднёвым захадзе паветра прагрэецца да плюс 24.
У сераду малаактыўны атмасферны фронт выкліча ў некаторых раёнах кароткачасовыя дажджы. На тэрыторыю Беларусі пачне паступаць больш халоднае паветра са Скандынавіі, у сувязі з гэтым чакаецца пахаладанне. Тэмпература паветра ўначы складзе 2-8 градусаў вышэй за нуль, удзень - 10-15 градусаў цяпла. У паўднёвых раёнах будзе цяплей: уначы - плюс 9-12, удзень - 16-20 градусаў.
Уначы і раніцай у чацвер, 12 красавіка, пад уплывам атмасфернага фронту ў некаторых раёнах пройдуць кароткачасовыя дажджы, удзень з ростам атмасфернага ціску будзе пераважна без ападкаў. Тэмпература паветра ўначы складзе ад мінус 2 да плюс 5 градусаў, у другой палове дня павысіцца да 10-16 градусаў цяпла. У паўднёвых раёнах уначы будзе 6-10 градусаў вышэй за нуль, удзень - плюс 17-19.
У пятніцу, 13 красавіка, надвор'е будзе ў асноўным вызначаць вобласць павышанага ціску. Чакаецца пераважна без ападкаў, толькі па паўднёвым захадзе магчымы кароткачасовыя дажджы. Тэмпература паветра ноччу складзе ад мінус 3 да плюс 4 градусаў, удзень - 10-16 градусаў цяпла. У паўднёва-заходніх раёнах ноччу будзе 5-9 градусаў вышэй за нуль, удзень - плюс 17-19.-0-
