25 чэрвеня, Мінск /Аліна Грышкевіч - БЕЛТА/. Традыцыя Еўрапейскіх гульняў можа ўнесці важны ўклад у забеспячэнне мірнай будучыні Еўропы. Аб гэтым заявіў намеснік міністра замежных спраў Беларусі Андрэй Дапкюнас у час канферэнцыі "Спартыўная дыпламатыя: стварэнне магчымасцей праз спорт" у Мінску, перадае карэспандэнт БЕЛТА.
"Гэта будучыня можа і павінна стаць рэальнасцю, калі палітыкі, усе людзі добрай волі выкарыстоўваюць маральны зарад гульняў для спынення братазабойчых войнаў і кровапралітных канфліктаў у Еўропе, для сумеснага пошуку шляхоў да неабходнага дыялогу", - заявіў Андрэй Дапкюнас.
Экспертна-дыпламатычнае мерапрыемства "Спартыўная дыпламатыя: стварэнне магчымасцей праз спорт" арганізавана фондам "Дырэкцыя II Еўрапейскіх гульняў 2019 года" сумесна з Беларускім інстытутам стратэгічных даследаванняў і з'яўляецца ўнікальным па фармаце і мэтах. Канферэнцыя ўпершыню праводзіцца на спартыўным аб'екце ў час спаборніцтваў міжнароднага маштабу. Экспертная супольнасць абмяркоўвае магчымасці спартыўнай дыпламатыі па выбудоўванні мастоў паміж краінамі, супольнасцямі, людзьмі, а таксама ўклад спартыўных спаборніцтваў вышэйшага ўзроўню ва ўстойлівае развіццё, ролю ў гэтых працэсах алімпійскіх каштоўнасцей, грамадзянскай супольнасці і валанцёрскага руху, высокапастаўленых афіцыйных асоб і экспертаў.-0-
