26 лютага, Мінск /Кар. БЕЛТА/. Тэлеканал Euronews прадставіў іміджавае відэа пра Мінск і Беларусь для размяшчэння ў сваёй эфірнай сетцы, паведамілі БЕЛТА ў прэс-службе дырэкцыі II Еўрапейскіх гульняў.
Ролік ужо дэманструецца на тэлеканале і расказвае пра горад і яго наваколле, выдатныя мясціны, якія могуць наведаць госці Мінска.
Канцэпцыя відэа была распрацавана сумеснымі намаганнямі тэлеканала Euronews, крэатыўнага агенцтва Contended (Лондан), а таксама дырэкцыі II Еўрапейскіх гульняў.
Як паведамлялася, фонд "Дырэкцыя II Еўрапейскіх гульняў 2019 года" і тэлеканал Euronews заключылі дагавор аб інфармацыйным супрацоўніцтве. У адпаведнасці з ім еўрапейскі тэлеканал размесціць у сваім эфіры відэаролікі, прысвечаныя Беларусі і ў прыватнасці II Еўрапейскім гульням 2019 года.
Euronews - еўрапейскі штодзённы кругласутачны інфармацыйны тэлеканал, які вядзе вяшчанне на 12 мовах у больш як 160 краінах свету. Аўдыторыя канала складае больш за 430 млн чалавек.
II Еўрапейскія гульні пройдуць у Мінску з 21 па 30 чэрвеня. Больш за 4 тыс. атлетаў з 50 краін разыграюць 199 камплектаў узнагарод у 15 відах спорту. Спаборніцтвы ў васьмі відах стануць кваліфікацыйнымі да XXXII Алімпійскіх гульняў 2020 года ў Токіа.-0-
