8 верасня, Мінск /Кар. БЕЛТА/. Святочная праграма, прысвечаная Дню горада, разгарнулася 8 верасня ў Мінску на 20 пляцоўках, паведамілі карэспандэнту БЕЛТА ва ўпраўленні культуры Мінгарвыканкама.
Так, на зялёнай зоне на скрыжаванні пр. Пераможцаў і Машэрава праходзіць міжнародны фестываль "Мiнск старажытны", які адкрыўся ў 11.00 парадам клубаў гістарычнай рэканструкцыі. Гасцей таксама чакаюць рыцарскія, конныя турніры, турніры лучнікаў, паказальныя выступленні. Будзе адноўлена атмасфера мінулых эпох: ад Старажытнага Рыма і часоў вікінгаў да Другой сусветнай вайны. З 18.40 да 19.40 адбудзецца масавая тэатралізаваная бітва з імправізаваным штурмам замка. Увесь дзень будуць працаваць палатачныя лагеры, гандлёвыя рады, кірмаш рамеснікаў, манетны двор. Гасцям прапануюць паўдзельнічаць у майстар-класах, прабегчы сярэдневяковую паласу перашкод, пакатацца на атракцыёнах. Акрамя беларускіх клубаў гістарычнай рэканструкцыі, тут чакаюць гасцей з краін-суседак - Расіі, Літвы, Украіны. Перад гледачамі выступяць групы "Хмельны Вiр", Spiritual Season, Pawa, Нok-Key, Lity Taler, "Без панікі", "Няміга" і інш. Канцэрт прадоўжыцца да 23.00.
Каля Палаца спорту разгарнулася маштабнае фізкультурна-спартыўнае свята. З 11.00 да 15.00 тут прайшлі забегі на роліках, вялікая парусная рэгата, паказальныя выступленні каратыстаў, барцоў, майстар-класы па шахматах і валейболе, спаборніцтвы сярод пажарных-ратавальнікаў. Запланаваны і міжнародны турнір па сілавым экстрыме Minsk Open Cup-2018. На свята запрошаны вядомыя беларускія спартсмены. У другой палавіне дня тут жа адбудзецца Мінскі open air з удзелам Паліны Рэспубліка, груп Shuma, Akute і інш. Канцэрт будзе доўжыцца да 23.00. Завершыць вечар музычнае піратэхнічнае феерверк-шоу.
Верхні горад прадставіць праект "Мінск - горад прыгажосці". Каля гарадской ратушы адбудуцца модныя паказы, перад гасцямі выступяць заслужаныя артысткі Беларусі Алёна Ланская, Вікторыя Алешка, ансамбль "Сябрынка", танцавальны калектыў "Страказа", групы "Бай-сіці", аркестр і салісты Інстытута пагранічнай службы Беларусі, Герман, Аляксандра Гайдук, Аляксей Хлястоў, шоу-тэатр "Хвiлинка", шоу-балет "Феерыя". Свята прадоўжыцца з 12.00 да 22.30. З 12.00 да 17.00 тут таксама пройдуць прыгожыя вясельныя цырымоніі.
Дзень адкрытых дзвярэй у Дзень горада праводзіц Беларускі дзяржаўны цырк. У фае будзе працаваць выстаўка, прысвечаная гісторыі цыркавога мастацтва, адкрыюцца інтэрактыўныя зоны. Можна блізка паглядзець палотны, на якіх лятаюць паветраныя гімнасты, даведацца, колькі важыць гіра, убачыць рэквізіт эквілібрыстаў, клоўнаў і дрэсіроўшчыкаў, прайсці майстар-клас па жангліраванні, зрабіць фота і паразмаўляць з артыстамі.
Цэнтральны Батанічны сад запрашае 8 верасня з 12.00 да 20.00 акунуцца ў свет навукі. Тэматычны фестываль арганізуе Савет маладых вучоных Нацыянальнай акадэміі навук Беларусі. Пазнавальныя лекцыі, майстар-класы, робаты, тры музеі навукі, зона пра космас і археалагічныя знаходкі, шоу з эксперыментамі на сцэне, забавы для дзяцей - арганізатары падумалі пра інтарэсы наведвальнікаў розных узростаў.
Святочную праграму падрыхтавала і Дзіцячая чыгунка. Вясёлыя казачныя персанажы запрашаюць юных жыхароў сталіцы адправіцца ў падарожжа ад станцыі "Заслонава" да станцыі "Сасновы бор". Па дарозе ім прапануюць гульні, напіткі, марожанае.
У Заводскім раёне асноўнай святочнай пляцоўкай стане тэрыторыя каля "Чыжоўка-Арэны". З 10.00 тут разгарнуўся кірмаш, адкрыліся інтэрактыўныя пляцоўкі, дзіцячы гарадок. Гасцям прапануюць пакатацца на роліках, паўдзельнічаць у майстар-класах ад сеткі фітнес-клубаў, пазмагацца ў лазертагу, акунуцца ў віртуальную рэальнасць і інш. Для дзяцей 2-5 гадоў арганізуюць спаборніцтвы на бегавелах. Таксама ў праграме дэфіле ад народнага тэатра-студыі моды "Авантаж", выступленні творчых калектываў. Адметная падзеяй свята стане забег на абцасах. Старт модніц запланаваны на 15.00. Пра жаданне прыняць удзел у конкурсе ўжо заявілі больш за 30 прадстаўніц прыгожага полу.
У Ленінскім раёне гулянні з 12.00 да 18.00 праходзяць у Лошыцкім сядзібна-паркавым комплексе, з 12.00 да 16.00 - перад кінатэатрам "Салют". Працуюць гандлёвыя рады, атракцыёны, фуд-корты з разнастайнай кухняй, праходзяць канцэрты. У прыватнасці, у Лошыцкім парку акцэнт зроблены на музыку народаў свету і класічныя творы ў выкананні аркестравых калектываў раёна. Тэрыторыя зялёнай зоны ўмоўна падзелена на эпохі, кожная з якіх прадставіць забавы таго ці іншага часу. Таксама праходзіць фестываль фарбаў, з'явіліся пляцоўкі для гульні ў бампербол, пейнтбол і лазертаг.
У Маскоўскім раёне свята з 10.00 да 18.00 адбудзецца ў парку імя Паўлава. Прадугледжана 10 тэматычных пляцовак. Акрамя канцэрта, госці ўбачаць спаборніцтвы па велабіятлоне (пачатак у 14.30), паркавым валейболе, маладзёжную фота-квест-гульню "Маскоўскія лабірынты", адбудуцца акцыя "Харавы сход", прысвечаная Году малой радзімы, майстар-класы па саломапляценні, выцінанцы і інш. Дзяцей будуць забаўляць аніматары, роставыя лялькі, хадулісты.
У Кастрычніцкім раёне цэнтрам святкавання стане парк "Курасоўшчына". З 12.00 да 19.00 тут праходзіць танцавальна-забаўляльная праграма з удзелам духавога аркестра, артыстаў беларускай эстрады, паказам модных калекцый, правядзеннем вясельных абрадаў. Запланаваны турніры па шахматах, шашках, дартсе, пераносе грузаў, міні-футболе, трэніровачныя заняткі па каратэ і фехтаванні, паказальныя выступленні на лыжаролерах і выратавальных катараў. На набярэжнай разгорнецца выстаўка судна- і авіямадэлей, пленэр юных мастакоў, выстаўка дасягненняў прадпрыемстваў раёна, у парку - горад майстроў, мядовы падворак. Прадугледжаны дзіцячыя забавы, арганізуюць катанне на конях. Таксама тут выберуць найбольш арыгінальна аформленую гандлёвую кропку і лепшы шашлык лета.
У Першамайскім раёне з 13.00 да 18.00 жыхароў запрашаюць на свята ў парк культуры і адпачынку імя Чалюскінцаў. Арганізатары абяцаюць мноства атракцыёнаў, выступленні артыстаў, выстаўку-кірмаш дэкаратыўна-прыкладнай творчасці. Маленькім наведвальнікам прапануюць квест-гульню, майстар-класы па каратэ, мастацкай гімнастыцы. Забаўляць гасцей будуць поп-фолк групы "Спадчынка", "Медавуха", "Вялес", "Забабоны", "Лялькі Карпарэйшн", "Правакацыя", салісты беларускай эстрады. На валейбольнай пляцоўцы пройдзе турнір па паркавым валейболе сярод аматарскіх каманд. Клуб аматараў тхароў "Фурытус" запрашае паглядзець паказальныя выступленні тхароў. Будуць арганізаваны фота-зоны, зоны аквагрыму.
Партызанскі раён запрашае на свята ў парк імя Горкага, парк экстрэмальных відаў спорту па вул. Сталетава і на пляцоўку па вул. Карвата. У парку імя Горкага з 12.00 да 18.00 пройдзе канцэртная праграма з удзелам дзіцячых творчых калектываў і зорак эстрады. Таксама адбудзецца ўзнагароджванне пераможцаў конкурсу "Формула саду" на лепшы праект па добраўпарадкаванні і азеляненні тэрыторый устаноў адукацыі. На набярэжнай разгорнецца пляцоўка раённай арганізацыі таварыства Чырвонага крыжа, прымеркаваная да Міжнароднага дня донара. У парку экстрэмальных відаў спорту з 12.00 да 16.00 адбудзецца мерапрыемства, прымеркаванае да 40-годдзя цэнтра дадатковай адукацыі "Вікторыя", з 17.00 да 22.30 - гарадскі маладзёжны фестываль БРСМ са спаборніцтвамі, дыскатэкай, феерверкам. На пляцоўцы па вул. Карвата арганізуюць сямейнае свята мікрараёна Сцяпянка з 12.00 да 16.00.
У Савецкім раёне галоўная раённая пляцоўка з 12.00 да 18.00 будзе працаваць на пляцоўцы перад "Лідо" па вул. Кульман. Прадугледжаны выступленні самадзейных калектываў прадпрыемстваў, устаноў раёна, арт-групы "Беларусы", групы "Правакацыя", кавер-бэндаў, спартсменаў, розыгрышы прызоў ад спонсараў у абмен на пачкі цыгарэт. Разгорнецца выстаўка-продаж спартыўных тавараў і турыстычнага рыштунку, веласіпедаў, экапрадуктаў, чаю, мёду, вострых прыпраў, натуральнай касметыкі і інш. Спартсмены па бодзібілдынгу і фітнесу пракансультуюць па пытаннях трэніровак і харчавання, правядуць фота і аўтограф-сесію. Таксама тут правядуць прэзентацыю праектаў па здаровым ладзе жыцця, квест-гульні па гісторыі горада, арганізуюць фан-зоны спартсменаў.
У Фрунзенскім раёне свята пройдзе ў двух парках. Так, з 14.30 да 16.00 мінчан чакае "Веладрайв-2018" з удзелам кіраўніка раёна Арцёма Цурана, старшыні Беларускай федэрацыі веласіпеднага спорту Наталлі Цылінскай. Плануецца тры заезды па маршруце Лядовы палац - вул. Прытыцкага - вул. Кунцаўшчына - вул. Казіміраўская - фініш у парку імя Уга Чавеса з уручэннем памятных медалёў.
Парк 60-годдзя Кастрычніка будзе падзелены на некалькі тэматычных зон. З 12.00 да 17.00 на стацыянарнай летняй сцэне для гледачоў пажылога ўзросту арганізавана праграма з выступленнямі калектываў тэрытарыяльнага цэнтра сацыяльнага абслугоўвання, музычных школ і каледжаў, дыскатэкай "Для тых, каму за". Для дзяцей з 12.00 да 20.00 будуць працаваць батуты, горкі, аквагрым, атракцыёны, фотазоны, аніматары. Каля фантана размесціцца новы атракцыён "Шары на вадзе" і традыцыйна прагучыць інструментальны музычны феерверк зводнага аркестра настаўнікаў "Дыямент". У лесапаласе арганізуюць "Лучны лазертаг". У цэнтры парку на сцэне з 13.30 да 20.00 пройдзе Кавер-бэнд фэст з удзелам груп "Мята", "Озорные ребята", Sandai Band, "Прапаганда", выступіць Аляксей Грос. З 16.00 да 18.00 усіх запрашаюць на дыскатэку. Фудкорт будзе ўключаць 15 палатак і больш за 600 пасадачных месцаў.
У парку імя Уга Чавеса пройдзе сямейнае свята Family Party. З 12.00 да 16.00 тут праходзяць канцэрты, з 16.00 да 18.00 - фестываль Color Fest і шоу мыльных шароў, з 18.00 да 20.00 - вечарынка. Адкрыецца інтэрактыўная Паляна казак, фотазоны, арганізуюць майстар-класы.
У Цэнтральным раёне раённае свята адзначаецца ў парку Перамогі і Траецкім прадмесці з 12.00 да 17.00. У парку Перамогі выступяць група "Беларускi гасцiнец", ансамбль "Спадчына", Мікіта Фаміных, балет "Супер Ціві-Шоу", Святлана Шыманская, Ігар Аксюта, Валерый Скаражонак і інш., у Траецкім прадмесці будуць працаваць інтэрактыўныя і творчыя пляцоўкі, арганізуюць вулічны гандаль, выстаўку-кірмаш сувеніраў.
Прадоўжыцца святкаванне і 9 верасня. Мінчан і гасцей сталіцы запрашаюць на "Дзень танкіста" ў парку Перамогі, фестываль гістарычнай рэканструкцыі на зялёную зону на скрыжаванні пр. Пераможцаў і Машэрава, III Свята дружбы "Італія - Беларусь" на тэрыторыі Верхняга горада, маладзёжны фестываль Minsk street summit у парк экстрэмальных відаў спорту, "Свята ў Траецкім прадмесці".-0-
