25 жніўня, Мінск /Кар. БЕЛТА/. Стэрэатып спажывецкага стаўлення бацькоў да школы неабходна мяняць. Аб гэтым заявіў міністр адукацыі Міхаіл Жураўкоў сёння на жнівеньскай канферэнцыі педагагічных работнікаў устаноў адукацыі Мінска "Сталічная адукацыя. Стратэгія развіцця", перадае карэспандэнт БЕЛТА.
Нагадаўшы, што ў сістэме адукацыі тры кампаненты (настаўнікі, вучні і бацькі), Міхаіл Жураўкоў канстатаваў, што бацькі даволі па-спажывецку ставяцца да школ. "Давайце мяняць гэты стэрэатып і больш актыўна ўключаць бацькоў у навучальны працэс", - звярнуўся да ўдзельнікаў форуму кіраўнік профільнага ведамства. Ён заклікаў педагогаў сталіцы да дыялогу з бацькамі. "Давайце расказваць, што калі бацькі не будуць удзяляць увагі вучобе дзяцей дома, не будуць асабістым прыкладам выхоўваць сваіх дзяцей, то нічога не атрымаецца", - сказаў Міхаіл Жураўкоў. Міністэрства адукацыі ў гэтым напрамку ўжо сфармулявала мэты і задачы.
Міхаіл Жураўкоў таксама выказаў пажаданне адносна выкарыстання шостага школьнага дня ў якасці прафарыентацыйнага. "Мы заклікаем цесна супрацоўнічаць з установамі прафесійна-тэхнічнай адукацыі (ПТА) і ВНУ, каб школьнікі прыходзілі ва ўніверсітэты і ўстановы ПТА. Каб у шосты школьны дзень больш вучняў наведвалі пляцоўкі ВНУ, каледжаў, там удзельнічалі ў вучэннях, спартыўных мерапрыемствах", - сказаў міністр. На яго думку, такая своеасаблівая прафарыентацыйная работа дасць магчымасць сарыентаваць вучняў ужо да 10 класа, які профіль яны хацелі б выбраць і чым займацца.
У форуме прынялі ўдзел намеснік прэм'ер-міністра Наталля Качанава, памочнік Прэзідэнта - галоўны інспектар па горадзе Мінску Аляксандр Якабсон, старшыня Мінгарвыканкама Андрэй Шорац.-0-
