26 кастрычніка, Мінск /Кар. БЕЛТА/. Сталічная Дзяржаўтаінспекцыя ўзмоцніць кантроль за дзіцячай бяспекай на дарогах з 31 кастрычніка, паведаміла БЕЛТА інспектар па агітацыі і прапагандзе УДАІ УУС Мінгарвынкама Вераніка Раманькова.
"Настае пара асенніх канікул, адпаведна, у гэты перыяд, значна ўзрастае рызыка дарожна-транспартных здарэнняў з удзелам дзяцей. Бацькі павінны помніць аб адказнасці за бяспечныя паводзіны дзяцей на праезнай частцы і паблізу яе. Неабходна пастаянна кантраляваць месцазнаходжанне дзіцяці і цікавіцца, чым менавіта яно займаецца на вуліцы, тлумачыць юным удзельнікам руху, што нельга рэзка выходзіць або выбягаць на дарогу з-за прыпаркаваных аўтамабіляў, дрэў, кустоў або збудаванняў, нават калі гэта дарога знаходзіцца на прылеглай да жылой зоны тэрыторыі. Вадзіцелі павінны быць максімальна ўважлівымі і быць гатовымі да раптоўнага з'яўлення дзяцей паблізу дарогі", - адзначылі ў інспекцыі.
У ДАІ падкрэслілі, што неабходна абазначыць адзенне дзяцей святловяртальнымі элементамі, якія дапамогуць вадзіцелю своечасова заўважыць дзіця пры пераходзе дарогі. "Пешаходам вельмі важна помніць, што ў час дажджу блікі на мокрай дарозе і сустрэчнае асляпленне перашкаджаюць вадзіцелю вас своечасова ўбачыць, асабліва ў цемнаце. Таксама трэба выключыць доступ дзяцей да ключэй ад аўтамабіляў і мотатранспарту. Адпраўляючыся ў паездку, не забудзьце пра дзіцячае ўтрымліваючае ўстройства: крэсла, бустэр. Кожнае дзіця да 12 гадоў павінна перавозіцца ў спецыяльным крэсле, у адпаведнасці з ростам і вагой", - расказала Вераніка Раманькова.
У Мінску за 9 месяцаў з удзелам дзяцей ва ўзросце да 16 гадоў зарэгістравана 37 ДТЗ, у выніку якіх 2 дзіцяці загінулі (1 пешаход, 1 веласіпедыст), 35 - атрымалі цялесныя пашкоджанні рознай ступені цяжкасці.-0-
