4 верасня, Мінск /Кар. БЕЛТА/. Сістэма жыллёва-будаўнічых зберажэнняў стане адным з вектараў развіцця жыллёвага будаўніцтва. Аб гэтым паведаміў журналістам на выстаўцы "Будпрагрэс-2018", адказваючы на пытанне карэспандэнта БЕЛТА, намеснік прэм'ер-міністра Уладзімір Кухараў.
"Над гэтым пытаннем (сістэмай жыллёва-будаўнічых зберажэнняў. - Заўвага БЕЛТА) шчыльна працуе ўрад, даручэнні дадзены Міністэрству архітэктуры і будаўніцтва і іншым ведамствам. Магчымасць накаплення за кошт уласных сродкаў грамадзян будзе адным з вектараў будаўніцтва жылля, - сказаў Уладзімір Кухараў. - Сёння грамадзяне могуць прэтэндаваць на субсідыі. Дзяржава зробіць усё магчымае для зніжэння кошту жылля".
Як паведамлялася, сістэма жыллёва-будаўнічых зберажэнняў прадугледжвае перыяд ад трох да сямі гадоў, за час якога неабходна накапіць не менш як 30 працэнтаў ад кошту будучага жылля. На астатнія 70 працэнтаў кошту прадастаўляецца крэдыт на перыяд ад 15 да 20 гадоў. Стаўка па крэдыце будзе на 1-2 працэнтныя пункты ніжэйшая за рыначную.
Міжнародная будаўнічая выстаўка "Будпрагрэс-2018" адкрылася сёння ў мінскім Футбольным манежы і прадоўжыцца па 7 верасня. Экспазіцыя прысвечана новым будаўнічым прадуктам, сучасным тэхналогіям, абсталяванню. Свае навінкі дэманструюць каля 160 будаўнічых кампаній з Беларусі, Расіі, Украіны, Польшчы, Латвіі, Літвы, Эстоніі, Кітая, Бельгіі і іншых краін. Калектыўныя экспазіцыі сфарміравалі вытворцы з Кітая, Польшчы, Цвярской і Наўгародскай абласцей Расіі. Стэнды падзелены па тэматыцы: будаўнічыя і аддзелачныя матэрыялы; фасад, дах, ізаляцыя; ацяпленне, водазабеспячэнне, сантэхніка, вентыляцыя; вокны, дзверы, вароты, лесвіцы, ралеты; дызайн інтэр'еру і прадметы дэкору; будаўнічыя сумесі і лакафарбавая прадукцыя; плітка і мармур; драўляныя дамы, дачы, саўны і лазні; расліны, прадметы азелянення і добраўпарадкавання.-0-
