23 мая, Мінск /Кар. БЕЛТА/. Савет па развіцці прадпрымальніцтва накіраваў у Савет Міністраў свае прапановы па ўрэгуляванні сітуацыі ў сферы аўтамабільных перавозак пасажыраў, сфарміраваныя спецыяльнай рабочай групай. Адпаведная інфармацыя размешчана на сайце савета, паведамляе БЕЛТА.
Для стварэння празрыстых і канкурэнтных умоў дзейнасці на рынку пасажырскіх перавозак, якія ўлічваюць інтарэсы розных катэгорый суб'ектаў, прапануецца падрыхтаваць праект дэкрэта, які прадугледжвае ўкараненне новых умоў арганізацыі і выканання міжгародніх унутрыабласных і міжгародніх міжабласных аўтамабільных перавозак пасажыраў у рэгулярных зносінах, а таксама разгледзець магчымасць стварэння адзінага рэспубліканскага аператара аўтамабільных перавозак у выглядзе бізнес-асацыяцыі на ўмовах самарэгулявання.
Сярод прапаноў спецыяльнай рабочай групы - адмена конкурсу на права выканання аўтамабільных перавозак у рэгулярных зносінах; устанаўленне заяўнага парадку атрымання права выканання аўтаперавозак на аснове заключэння дагавора паміж заказчыкам (аператарам) і аўтамабільным перавозчыкам або іншай упаўнаважанай ім асобай па заяўленым маршруце, раскладзе, інтэрвалах руху транспартных сродкаў; магчымасць функцыянавання так званых дыспетчарскіх службаў з вызначэннем іх прававога статусу, правоў, абавязкаў і адказнасці.
Акрамя таго, прапануецца ўстанавіць вычарпальны пералік патрабаванняў да аўтамабільных перавозчыкаў (адносна транспартнага сродку, вадзіцельскага складу), пры выкананні якіх заказчык (аператар) не можа адмовіць у заключэнні дагавора на права выканання аўтамабільных перавозак у рэгулярных зносінах. На пачатковым этапе дзеяння дэкрэта (на працягу, напрыклад, двух гадоў) варта прадугледзець больш ліберальныя ўмовы, якія дазволяць увайсці на рынак рэгулярных перавозак максімальнай колькасці суб'ектаў гаспадарання, а праз пэўны прамежак часу - устанавіць больш строгія патрабаванні адносна абнаўлення аўтапарка, а таксама забеспячэння пастаяннага кантролю за скорасным рэжымам аўтамабіля, рэжымамі працы і адпачынку вадзіцеляў. Прадугледжваецца наяўнасць вычарпальнага пераліку ўмоў спынення заказчыкам (аператарам) дагаворных адносін з аўтаперавозчыкам.
У Савеце па развіцці прадпрымальніцтва звяртаюць увагу на неабходнасць спрашчэння працэдуры фарміравання маршрутаў аўтамабільных перавозак пасажыраў у рэгулярных зносінах на пэўнай тэрыторыі, распрацоўкі і вядзення пашпартоў маршруту, а таксама неабходнасць аднастайных падыходаў па фарміраванні цэн (тарыфаў) на паслугі пасажырскіх тэрміналаў. Прапануецца ўстанавіць забарону на навязванне дадатковых паслуг для перавозчыкаў з боку тэрміналаў.
Праблемы ў сферы аўтамабільных перавозак пасажыраў узніклі ў сувязі з уступленнем у сілу з 23 студзеня 2018 года змяненняў у закон "Аб аўтамабільным транспарце і аўтамабільных перавозках", якія істотна трансфарміравалі падыходы да вызначэння і, адпаведна, рэгулявання аўтамабільных перавозак пасажыраў у рэгулярных і нерэгулярных зносінах.-0-