9 снежня, Мінск /Кар. БЕЛТА/. Савет Міністраў пастановай ад 7 снежня 2016 года нумар 998 унёс змяненні і дапаўненні ў Палажэнне аб парадку пакрыцця ў рэспубліканскі і (або) мясцовыя бюджэты сродкаў, затрачаных дзяржавай на падрыхтоўку навуковага работніка вышэйшай кваліфікацыі, спецыяліста, рабочага, служачага. Адпаведная інфармацыя размешчана на афіцыйным сайце беларускага ўрада, паведамляе БЕЛТА.
У прыватнасці, выкладзены ў новай рэдакцыі парадак разліку сродкаў, затрачаных дзяржавай на падрыхтоўку рабочага, спецыяліста, навуковага работніка і кампенсуемых у выпадку неадпрацоўкі выпускнікамі ўстаноў прафесійна-тэхнічнай, сярэдняй спецыяльнай і вышэйшай адукацыі па размеркаванні.
Акрамя таго, дакументам удакладнены нормы бюджэтнай класіфікацыі, спрошчана формула разліку кампенсуемых сродкаў.
З сумы расходаў, што пакрываюць грамадзяне, выключаны расходы на сацыяльную падтрымку (стыпендыі, прадастаўленне бясплатнага харчавання для асобных катэгорый навучэнцаў, расходы на ўтрыманне інтэрнатаў), а таксама расходы на атрыманне агульнай сярэдняй адукацыі пры атрыманні адукацыі ва ўстановах прафесійна-тэхнічнай і сярэдняй спецыяльнай адукацыі на аснове агульнай базавай адукацыі з атрыманнем агульнай сярэдняй адукацыі.
Для паўнаты рэгулявання ўключаны раней не адлюстраваныя ў заканадаўстве: умова, што ў суму кампенсуемых грамадзянамі сродкаў не ўключаецца перыяд іх водпускаў (акадэмічных і па доглядзе дзіцяці, службы ва Узброеных Сілах), нормы аб разліку сумы сродкаў пры атрыманні адукацыі ў розных установах адукацыі.
Гэта пастанова ўступае ў сілу пасля яе афіцыйнага апублікавання.-0-