4 кастрычніка, Мінск /Алена Прус - БЕЛТА/. Фінал трэцяга рэспубліканскага конкурсу "Сям'я года" адбудзецца 27 кастрычніка ў Беларускім рэспубліканскім тэатры юнага гледача, паведамілі карэспандэнту БЕЛТА ў Міністэрстве працы і сацыяльнай абароны.
За перамогу будуць змагацца сем сем'яў - пераможцаў Мінскага гарадскога і абласных конкурсаў. Гэта сем'і Хвясюк з Мікашэвіч Лунінецкага раёна Брэсцкай вобласці, Краўчук з Віцебска, Пятрушка з Калінкавіч Гомельскай вобласці, Сідар з аграгарадка Лунна Мастоўскага раёна Гродзенскай вобласці, Яўтух з Нясвіжа Мінскай вобласці, Сокал з Глуска Магілёўскай вобласці і Войцех з Мінска.
Конкурс нацэлены на ўмацаванне інстытута сям'і, павышэнне ролі і прэстыжу сям'і ў жыцці грамадства як ключавога фактара дзяржаўнай дэмаграфічнай палітыкі. Арганізацыйны камітэт па правядзенні конкурсу ўзначальвае намеснік прэм'ер-міністра Васіль Жарко.
Зацверджана эмблема конкурсу.
Пастановай Савета Міністраў ад 25 верасня 2017 года нумар 714 Міністэрству працы і сацыяльнай абароны даручана забяспечыць правядзенне фіналу конкурсу. За арганізацыю першага (рэгіянальнага) этапу адказнасць ускладзена на абласныя і Мінскі гарадскі выканаўчыя камітэты. Фінансаванне арганізацыі і правядзення рэспубліканскага конкурсу "Сям'я года" (у тым ліку ўзнагарода пераможцаў) ажыццяўляецца за кошт сродкаў, прадугледжаных у рэспубліканскім і мясцовых бюджэтах, іншых крыніц, не забароненых заканадаўствам.
Першы рэспубліканскі конкурс "Сям'я года" адбыўся ў 2012 годзе. Пастановай Міністэрства працы і сацыяльнай абароны ад 25 красавіка 2012 года нумар 53 зацверджана Інструкцыя аб парадку правядзення рэспубліканскага конкурсу "Сям'я года". Сярод яго асноўных задач: захаванне духоўна-маральных каштоўнасцей сям'і; пашырэнне ў грамадстве ідэі адказнага бацькоўства; адукацыя і выхаванне дзяцей і моладзі ў сістэме традыцыйных сямейных каштоўнасцей, арыентаваных на стабільнасць адносін, нараджэнне і выхаванне дзяцей, здаровы лад жыцця, пераемнасць пакаленняў, узаемаразуменне і ўзаемападтрымку.
Конкурс праводзіцца на добраахвотнай аснове сярод поўных сем'яў, якія выхоўваюць дваіх і больш дзяцей. На конкурсе сем'і прадстаўляюць сваю візітную картку ("Радавод") - гісторыю свайго роду, сямейныя звычаі і традыцыі. Яны таксама праводзяць прэзентацыю актыўнай жыццёвай пазіцыі членаў сям'і, захапленняў, поспехаў і дасягненняў і да таго падобнае (праект "Мая краіна - мая сям'я"). Пераможцамі конкурсу прызнаюцца сем'і, якія набралі найбольшую агульную колькасць балаў па выніках конкурсных мерапрыемстваў. Ім уручаюцца дыпломы I, II і III ступеней. Сям'і, якая атрымала дыплом I ступені, прысвойваецца ганаровае званне "Сям'я года".
Для пераможцаў фіналу конкурсу ўстаноўлены грашовыя прэміі: для ўзнагароджаных дыпломам I ступені - да 100 базавых велічынь; дыпломам II ступені - да 75 базавых велічынь; дыпломам III ступені - да 50 базавых велічынь (цяпер адна БВ складае Br23). Удзельнікі конкурсу могуць быць адзначаны спецыяльнымі дыпломамі, прызамі і іншымі ўзнагародамі.-0-
