26 жніўня, Мінск /Кар. БЕЛТА/. Рэспубліканскі спартыўны фестываль для працуючай моладзі "Алімпія - 2016" пройдзе 26-28 жніўня ў Валожынскім раёне пад дэвізам "Моладзь выбірае!", паведаміў БЕЛТА другі сакратар Цэнтральнага камітэта ГА "БРСМ" Сяргей Клішэвіч.
На тры дні палатачны гарадок на беразе маляўнічай ракі Іслач стане маладзёжнай сталіцай для самых ініцыятыўных юнакоў і дзяўчат. Фестываль збярэ актывістаў БРСМ, якія прысвяцілі сваю працоўную дзейнасць рабоце ў органах дзяржаўнага кіравання, на прадпрыемствах і ва ўстановах. Удзельнікамі стануць 20 маладзёжных каманд, у тым ліку з міністэрстваў адукацыі, інфармацыі, культуры, архітэктуры і будаўніцтва, сувязі і інфарматызацыі, па надзвычайных сітуацыях, Камітэта дзяржаўнага кантролю, а таксама Беларускай чыгункі.
Праграма будзе насычана рознымі мерапрыемствамі: камандныя і індывідуальныя спаборніцтвы (спаборніцтвы па футболе, валейболе, падняцці гіры, тэхніцы пешаходнага турызму і інш.); творчыя конкурсы (прэзентацыі каманд "Гэта Беларусь, краіна мая", бівуакаў і гатавання страў "Разам дом пабудуем", "Бітва дыджэяў"; інтэрактыўныя адукацыйныя тэматычныя пляцоўкі "Мой выбар - Беларусь", "Моладзь і культура", "Моладзь выбірае здаровы лад жыцця", "Традыцыі vs як Інавацыі", майстар-класы, прэзентацыі, сустрэчы з вядомымі людзьмі.
Афіцыйнае адкрыццё маладзёжнага форуму адбудзецца сёння ў 18.00. Словы прывітання і пажадання спартыўных і творчых перамог, каманднага духу і "пачуцця локця" ў барацьбе за "алімпійскія" медалі ў адрас удзельнікаў фестывалю прагучаць ад пачэсных гасцей фестывалю - прадстаўнікоў Адміністрацыі Прэзідэнта Беларусі, міністэрстваў і ведамстваў. Пройдуць парад каманд, цырымонія запуску паветранага шара, адкрыццё "Алімпійскіх гульняў" і запальванне "Алімпійскага агню", прэзентацыя інтэрактыўных пляцовак. Кожны жадаючы зможа паспрабаваць сябе ў народнай спартыўнай гульні "Сельскі боўлінг", паўдзельнічаць у майстар-класах па вырабе тэкстыльных лялек-абярэгаў, саламяных кветак і інш.
Адным з цэнтральных мерапрыемстваў першага дня стане "Адкрыты дыялог". Плануецца, што ў дыскусіі на тэму "Моладзь і палітыка": формула адказнасці" прымуць удзел каля 400 чалавек. Завершыцца фестывальны дзень конкурсам візітных картак "Гэта Беларусь, краіна мая!" і "Бітвай дыджэяў".
Не менш змястоўным абяцае быць другі дзень форуму. Запланаваны спартыўныя спаборніцтвы, творчыя конкурсы, фестываль-канцэрт аўтарскай (бардаўскай) песні "Песні мірных гадоў". Пазнавальнымі для ўдзельнікаў будуць адукацыйныя праграмы. Напрыклад, работа інтэрактыўнай пляцоўкі "Мой выбар - мая Беларусь" звязана з грамадзянска-патрыятычным выхаваннем моладзі і захаваннем памяці аб подзвігу беларускага народа ў час Вялікай Айчыннай вайны. На адукацыйнай пляцоўцы "Традыцыі vs як Інавацыі" будзе прапанавана прыняць удзел у фарсайт-дыскусіі, састаўной часткай якой стане БрэндШоу "Інавацыі як прадаўжэнне традыцый" ад Асацыяцыі "BelBrand".
Завершыць "Алімпію" ўрачыстая цырымонія закрыцця і ўзнагароджанне каманд.
Мэта фестывалю, арганізатарамі якога выступаюць БРСМ, Міністэрства адукацыі Беларусі, Міністэрства спорту і турызму, Міністэрства інфармацыі, Беларуская чыгунка, Мінскі абласны выканаўчы камітэт, - прапаганда здаровага ладу жыцця, навучанне і аб'яднанне маладзёжных лідараў праз адукацыйныя, лідарскія праграмы і дыскусійныя пляцоўкі, павышэнне іх прававой і дзелавой культуры.-0-
