22 ліпеня, Мінск /Кар. БЕЛТА/. Рэкамендацыі наконт адпачынку беларускіх турыстаў у Турцыі застаюцца ранейшымі, паведамілі карэспандэнту БЕЛТА ў прэс-службе Міністэрства спорту і турызму.
"У сувязі са шматлікімі зваротамі грамадзян наконт адпачынку ў Турцыі інфармуем, што рэкамендацыі застаюцца ранейшымі", - паведамілі ў прэс-службе.
У Мінспорце нагадалі, што 16 ліпеня Міністэрства замежных спраў рэкамендавала беларускім грамадзянам да стабілізацыі сітуацыі ў краіне ўстрымацца ад запланаваных паездак у Турцыю. Беларускім грамадзянам, якія знаходзяцца цяпер у Турцыі, рэкамендавана захоўваць спакой і для ўласнай бяспекі выключыць наведванне месц масавага скопішча людзей, а таксама па магчымасці не пакідаць месца пражывання.
Дэпартамент па турызме Мінспорту і турызму звяртае ўвагу, што ў адпаведнасці з дзеючым заканадаўствам турысты, якія заключылі дагавор аказання турпаслуг і жадаючыя захаваць аплачаныя за тур грошы, маюць права звярнуцца ў сваю турыстычную кампанію з просьбай перабраніраваць тур на іншую дату або іншую краіну. Калі перабраніраваць тур не ўяўляецца магчымым, турысты маюць права адмовіцца ад падарожжа ў Турцыю. У такім выпадку трэба звярнуцца ў турыстычную кампанію, з якой заключаны дагавор, з просьбай скасаваць яго і падаць заяву аб вяртанні кошту туру.
Улічваючы, што да маючага адбыцца падарожжа можа заставацца няшмат часу, кампаніі могуць утрымаць з турыстаў расходы, звязаныя з арганізацыяй паездкі. Пры гэтым фактычна панесеныя расходы павінны пацвярджацца дакументальна і адлюстроўваць рэальныя расходы турыстычных кампаній, а не проста суму расходаў або загадзя зафіксаваны ў дагаворы працэнт ад кошту туру.
Пры нязгодзе з сумай фактычна панесеных расходаў турыст мае права яе аспрэчыць, у тым ліку ў судовым парадку.
Пры паступленні зваротаў Мінспорту рэкамендуе туркампаніям кіравацца нормамі закона "Аб турызме" і Правіламі аказання турыстычных паслуг.
У міністэрстве таксама праінфармавалі, што з 22 ліпеня Расія аднавіла рэгулярныя авіязносіны з Турцыяй. "Пасля атрымання ад турэцкага боку запэўненняў аб неадкладна прынятых мерах павышанай бяспекі знаходжання расійскіх грамадзян у аэрапортах і на тэрыторыі Турэцкай Рэспублікі з 22 ліпеня аднаўляюцца рэгулярныя зносіны для ўсіх авіякампаній, якія ажыццяўляюць вылеты з тэрыторыі Расіі ў Турцыю", - гаворыцца ў паведамленні Расавіяцыі. У Міністэрстве транспарту гэту інфармацыю пацвердзілі. Буйнейшы расійскі перавозчык "Аэрафлот" ужо адкрыў продаж білетаў у Стамбул і Анталью.-0-
