18 верасня, Мінск /Кар. БЕЛТА/. Міністр абароны Беларусі Андрэй Раўкоў не лічыць мэтазгодным каменціраваць выпады ваенных аналітыкаў адносна вучэння "Захад-2017". Аб гэтым ён заявіў у эфіры праграмы "Галоўны эфір" тэлеканала "Беларусь 1", паведамляе БЕЛТА.
"Апошнім часам, у тым ліку і ў Беларусі, з'явілася шмат аналітыкаў у ваеннай сферы, большасць з якіх, але не ўсе вядома, нават у арміі не служылі. Я хацеў бы пакінуць без каментарыяў іх выпады і выказванні", - сказаў Андрэй Раўкоў.
Паводле яго слоў, Беларусь вельмі транспарэнтна дзейнічае па вучэнні "Захад-2017", запрасіўшы неабходную колькасць наглядальнікаў, прадстаўнікоў сродкаў масавай інфармацыі, міжнародных арганізацый. "Тут поўная адкрытасць, абумоўленая не тым, што мы хочам перад некім апраўдацца, - падкрэсліў кіраўнік Мінабароны. - Думаю, што трэба і нашым суседзям быць больш адкрытымі".
Андрэй Раўкоў расказаў, што задачы, якія планаваліся на вучэнне "Захад-2017", выконваюцца. Такім чынам умацоўваецца абараназдольнасць Беларусі і Саюзнай дзяржавы.-0-
