19 верасня, Мінск /Кар. БЕЛТА/. Правілы добраўпарадкавання мемарыялаў, помнікаў воінскай славы, воінскіх пахаванняў і пахаванняў ахвяр войнаў зацверджаны пастановай Савета Міністраў ад 17 верасня 2018 года нумар 675, паведамляе БЕЛТА са спасылкай на сайт урада.
Як растлумачылі ў Саўміне, дакумент прыняты для забеспячэння захаванасці гэтых аб'ектаў і падтрымання ў належным парадку.
Згодна з правіламі, рашэнні, якія датычацца ўтрымання, добраўпарадкавання і падтрымання ў належным санітарным стане мемарыялаў, помнікаў воінскай славы, воінскіх пахаванняў і пахаванняў ахвяр войнаў і прылеглых да іх тэрыторый, прымаюцца мясцовымі выканаўчымі і распарадчымі органамі базавага і пярвічнага тэрытарыяльных узроўняў.
Мерапрыемствы па добраўпарадкаванні фінансуюцца за кошт сродкаў мясцовых бюджэтаў і іншых крыніц, не забароненых заканадаўствам.
Асобы, вінаватыя ў прычыненні шкоды мемарыялам, помнікам воінскай славы, воінскім пахаванням і пахаванням ахвяр войнаў, нясуць адказнасць у адпаведнасці з заканадаўчымі актамі.
Пастанова ўступае ў сілу пасля яе афіцыйнага апублікавання.-0-
