20 лютага, Мінск /Кар. БЕЛТА/. Першы намеснік Генеральнага сакратара ААН Аміна Махамед сёння наведала Рэспубліканскі рэабілітацыйны цэнтр для дзяцей-інвалідаў і высока ацаніла ўзровень дзяржаўна-прыватнага партнёрства і супрацоўніцтва з грамадскімі арганізацыямі ў пытанні забеспячэння аднолькавых умоў развіцця для ўсіх дзяцей, перадае карэспандэнт БЕЛТА.
Намеснік старшыні Савета Рэспублікі, нацыянальны каардынатар па дасягненні МУР Мар'яна Шчоткіна на прыкладзе цэнтра паказала Аміне Махамед, як пры ўзаемадзеянні сістэм аховы здароўя, адукацыі, прыватных партнёраў і валанцёраў арганізавана комплексная паэтапная рэабілітацыя дзяцей.
Паводле слоў дырэктара цэнтра Людмілы Кандрашовай, работа ўстановы адпавядае Мэтам устойлівага развіцця. "Мы працуем і ў сферы аховы здароўя, пры гэтым прытрымліваемся дэвіза "Ніхто не застаецца ўбаку", таму што ўзаемадзейнічаем з камітэтамі па працы, занятасцi i сацабароне ў рэгіёнах. Папаўняем спісы дзяцей, якія маюць патрэбу ў рэабілітацыі. Арганізавана паўнацэнная адукацыйная праграма і нават прафарыентацыя, ёсць шмат гульнявых элементаў. Таксама аказваецца псіхалагічная падтрымка для маці выхаванцаў. Дзякуючы ўдаламу размяшчэнню ў Севастопальскім парку мы прывівам дзецям клопат аб прыродзе. Не проста ствараем асяроддзе дзіцяці з асаблівасцямі, а стараемся зрабіць так, каб яно выйшла ў соцыум і стала раўнапраўным грамадзянінам", - адзначыла Людміла Кандрашова.
Цяпер у цэнтры знаходзяцца 98 дзяцей, падзеленых на 8 узроставых груп. Некаторыя праходзяць рэабілітацыю на дзённым стацыянары, для пражывання астатніх ёсць камфортныя пакоі, а таксама невялікая гасцініца, дзе могуць спыніцца бацькі іншагародніх выхаванцаў.
Госці азнаёміліся з работай аддзяленняў сацыяльнай і псіхолага-педагагічнай рэабілітацыі і адаптацыі, а таксама медрэабілітацыі. У пакоях малодшых груп Аміна Махамед убачыла, як з дапамогай сюжэтна-ролевых гульняў дзеці асвойваюць бытавыя навыкі, займаюцца на трэнажорах, праходзяць сеанс масажу, гуляюць разам з бацькамі. Яе асабліва кранула, калі хлопчык, які толькі нядаўна пачаў перамяшчацца самастойна, падышоў да яе, каб павітаць.
Хлопчыкі і дзяўчынкі, якія займаюцца ў гуртках па інтарэсах (дэкаратыўна-прыкладнай творчасці і інш.), падзяліліся сваімі поспехамі. Людміла Казлова, якая разам з 11-гадовай дачкой Палінай пачала асвойваць выраб абрадавых лялек, адзначыла, што вельмі добра мець з дзіцем агульнае хобі. Пакуль Аміна Махамед знаёмілася з захапленнямі выхаванцаў цэнтра, падораны ёй плецены кошык напаўняўся сувенірамі, вырабленымі дзецьмі.
Выхаванцы старшай групы паразмаўлялі з госцяй, яны цікавіліся яе работай і ўражаннямі аб Беларусі. "Я люблю сваю работу, таму што магу шмат сустракацца з рознымі людзьмі. У Беларусі вельмі шмат добрых людзей, і тут у цэнтры - асабліва. Мы ўсе служым чалавецтву. І гэта цудоўна", - сказала першы намеснік Генеральнага сакратара ААН. У адказ яна пацікавілася марамі дзяцей і запрасіла іх прыехаць да яе ў Нью-Ёрк у госці.
Дзяржустанова Міністэрства працы і сацыяльнай абароны "Рэспубліканскі рэабілітацыйны цэнтр для дзяцей-інвалідаў" адкрыта ў адпаведнасці з праграмай "Дзеці Беларусі" ў 2000 годзе, яна разлічана на адначасовае знаходжанне 120 хлопчыкаў і дзяўчынак. Цэнтр спраектаваны па аналагах еўрапейскіх устаноў для комплекснай рэабілітацыі па індывідуальных праграмах дзяцей з 3 да 18 гадоў з захворваннямі нервовай і касцёва-мышачнай сістэм, вынікам якіх з'яўляецца парушэнне функцый апорна-рухальнага апарату. За 17 гадоў рэабілітацыю ў цэнтры прайшлі больш за 17 678 дзяцей.-0-
