30 мая, Мінск /Кар. БЕЛТА/. Асноўнымі крытэрыямі для выпрацоўкі прапаноў па карэкціроўцы Асноўнага закона краіны з'яўляюцца бесперапыннасць канстытуцыйнага развіцця, пераемнасць і стабільнасць. Аб гэтым сёння журналістам заявіў старшыня Канстытуцыйнага суда Пётр Міклашэвіч, перадае карэспандэнт БЕЛТА.
Пётр Міклашэвіч адзначыў, што ў рабоце над прапановамі неабходна ўлічваць, што Канстытуцыя - гэта сістэмны дакумент, які комплексна рэгулюе праваадносіны ў грамадстве і дзяржаве. "Тут трэба забяспечыць бесперапыннасць канстытуцыйнага развіцця, пераемнасць і стабільнасць. Зыходзячы з гэтых крытэрыяў неабходна выпрацоўваць прапановы па карэкціроўцы", - сказаў ён.
Старшыня Канстытуцыйнага суда нагадаў, што Асноўны закон Беларусі ствараўся ў няпросты перыяд пераходу ад савецкай сістэмы дзяржаўнага будаўніцтва і грамадскага ўладкавання да новых іх форм. Час паказаў, што выпрацаваныя тады канстытуцыйныя палажэнні далі магчымасць на працягу 25 гадоў забяспечваць стабільнае і ўстойлівае развіццё грамадства і дзяржавы. Аднак канстытуцыйнае развіццё прадаўжаецца, змяняюцца грамадскія адносіны. Зыходзячы з гэтага кіраўнік дзяржавы абазначыў магчымасць карэкціроўкі некаторых палажэнняў Канстытуцыі.
Канстытуцыйны суд праводзіць у гэтым напрамку пэўную работу, у прыватнасці параўнальны аналіз канстытуцыйных палажэнняў іншых краін. У той жа час Пётр Міклашэвіч падкрэсліў, што Канстытуцыю ў Беларусі павінны "ўдасканальваць зыходзячы з аб'ектыўных рэалій, якія існуюць у грамадстве і дзяржаве".
Сёння ў Мінску стартавала двухдзённая міжнародная канферэнцыя "Сучаснае канстытуцыйнае развіццё: роля канстытуцыйнага кантролю ў канстытуцыяналізацыі права". Яна прымеркавана да 25-годдзя Канстытуцыі і ўтварэння КС Беларусі. У форуме прымаюць удзел дэлегацыі канстытуцыйных судоў Азербайджана, Арменіі, Балгарыі, Босніі і Герцагавіны, Грузіі, Казахстана, Кыргызстана, Латвіі, Расіі, Чэхіі, кіраўніцтва Еўрапейскай камісіі за дэмакратыю праз права (Венецыянская камісія), парламентарыі, вучоныя.-0-
Фота Максіма Гучака
