12 снежня, Гомель /Кар. БЕЛТА/. Патэнцыял і магчымасці маладых вучоных павінны быць у поўнай меры задзейнічаны пры фарміраванні лічбавай эканомікі. Такім меркаваннем з карэспандэнтам БЕЛТА падзяліўся кандыдат эканамічных навук, дацэнт кафедры эканамічнай тэорыі і сусветнай эканомікі Гомельскага дзяржаўнага ўніверсітэта імя Ф. Скарыны, дэлегат II З'езда вучоных Беларусі Аляксандр Баранаў.
Беларусь нацэлена на развіццё лічбавай эканомікі, найбольш прагрэсіўнай сістэмы ў свеце, асаблівую ролю ў гэтым павінен адыграць адпаведны дэкрэт, які чакаюць у тым ліку эканамісты. "У сувязі з гэтым рэзка ўзрастае роля навукі і інавацый. Маладыя вучоныя нестандартна мысляць, могуць прапанаваць новыя падыходы да фарміравання інфармацыйнай эканомікі, таму іх інтэлектуальны патэнцыял неабходна выкарыстоўваць максімальна", - лічыць Аляксандр Баранаў. На яго думку, пераход да новай сістэмы дасць магчымасць заняць дастойнае месца на сусветнай пляцоўцы, забяспечыць імклівы эканамічны рост і тэхналагічную незалежнасць.
Субяседнік падкрэсліў, што яму як маладому спецыялісту, чыя будучая доктарская дысертацыя прысвечана лічбавай эканоміцы, вельмі важна прыняць удзел у II З'ездзе вучоных, азнаёміцца са стратэгіяй развіцця навукі ва ўмовах фарміравання новага ўкладу. "Гэта дасць мне магчымасць унесці свой уклад у пабудову высокатэхналагічнай эканомікі нашай краіны", - дадаў ён.
II З'езд вучоных Беларусі пройдзе 12-13 снежня ў Мінску. У ім прымуць удзел 2,1 тыс. дэлегатаў з усіх рэгіёнаў. Чакаецца прыезд вядомых вучоных Саюзнай дзяржавы, СНД, вядучых замежных акадэмій навук, сусветных навукова-даследчых арганізацый і цэнтраў.-0-
