6 ліпеня, Мінск /Кар. БЕЛТА/. Памер адрасных субсідый на будаўніцтва жылля будзе змяняцца пры змяненні складу сям'і. Аб гэтым паведаміў сёння начальнік упраўлення жыллёвай палітыкі Міністэрства архітэктуры і будаўніцтва Аляксандр Горваль на брыфінгу ў прэс-цэнтры БЕЛТА.
Указам нумар 240 "Аб дзяржаўнай падтрымцы грамадзян пры будаўніцтве (рэканструкцыі) жылых памяшканняў" у дадатак да дзеючай сістэмы льготнага крэдытавання жыллёвага будаўніцтва ўводзіцца новы від дзяржаўнай падтрымкі грамадзян, маючых патрэбу ў паляпшэнні жыллёвых умоў, - дзяржаўныя адрасныя субсідыі. Умовамі прадастаўлення такой дзяржаўнай падтрымкі з'яўляюцца чарговасць атрымання і аднясенне грамадзян да катэгорыі малазабяспечаных.
Механізм прадастаўлення дзяржаўных субсідый распрацаваны з улікам максімальнага захавання прынцыпаў дзеючай сістэмы дзяржаўнай падтрымкі жыллёвага будаўніцтва: сума дзяржаўнай падтрымкі будзе разлічвацца зыходзячы з колькасці членаў сям'і, нарміруемых памераў жылога памяшкання і гранічнага нарматыву кошту будаўніцтва.
"Субсідыя будзе выплачвацца штомесяц у перыяд крэдытавання. Пры змяненні складу сям'і яе памер будзе змяняцца, - растлумачыў Аляксандр Горваль. - Змяняецца склад сям'і - пералічваецца базавы кошт крэдыту, уносяцца змяненні ў рашэнне выканкама і змяняецца памер субсідыі".
Паколькі памер субсідыі залежыць ад стаўкі рэфінансавання, то ён таксама будзе змяняцца ў працэсе плацяжоў у адпаведнасці з інфармацыяй Нацбанка аб змяненні стаўкі рэфінансавання (будзе праводзіцца пераразлік).
Што датычыцца механізма фінансавання, то субсідыі цэнтралізавана фарміруюцца пры зацвярджэнні бюджэту на чарговы фінансавы год, вызначаецца іх аб'ём, лічбы даводзяцца да абласцей і Мінска, Мінфін пералічвае гэтыя субсідыі ў бюджэты рэгіёнаў і сталіцы, потым грошы размяркоўваюцца па раёнах і гарадах, а выканкамы прымаюць рашэнне аб выдзяленні субсідый ільготнікам для будаўніцтва. Затым звесткі аб памеры субсідый цэнтралізуюцца на ўзроўні рэгіёнаў, і праводзіцца налічэнне персанальна на кожнага чалавека. "Грошы аддаюцца не банку, а паступаюць канкрэтнаму грамадзяніну", - падкрэсліў Аляксандр Горваль.-0-
