22 кастрычніка, Мінск /Кар. БЕЛТА/. Міжнародная навукова-практычная канферэнцыя "Аб удасканаленні інфармацыйнага ўзаемадзеяння, фарміраванні новых падыходаў да рэалізацыі ўзгодненай пагранічнай палітыкі ў сферы гарантавання бяспекі і аховы знешніх граніц дзяржаў СНД з улікам сучасных выклікаў і пагроз" пройдзе ў Маскве 25 кастрычніка, паведамілі БЕЛТА ў прэс-службе Выканкама СНД.
Удзел у канферэнцыі пацвердзілі пагранічныя ведамствы Арменіі, Беларусі, Казахстана, Кыргызстана, Расіі, Таджыкістана, Узбекістана, прадстаўнікі кампетэнтных органаў Садружнасці і іншых міжнародных арганізацый, а таксама шэраг навукова-даследчых і навучальных устаноў. Усяго да ўдзелу ў форуме акрэдытавана 25 дэлегацый. "Будуць разгледжаны навукова-метадалагічныя пытанні, звязаныя з фарміраваннем новых падыходаў да ўдасканалення інфармацыйнага ўзаемадзеяння паміж пагранічнымі ведамствамі і кампетэнтнымі міждзяржаўнымі органамі ў інтарэсах забеспячэння пагранічнай бяспекі ў рамках Канцэпцыі ўзгодненай пагранічнай палітыкі дзяржаў СНД, а таксама далейшым развіццём нарматыўнай прававой базы Садружнасці і сістэмы мер, якія садзейнічаюць яе практычнай рэалізацыі", - расказалі ў прэс-службе.
Па выніках работы канферэнцыі прадугледжваецца прыняцце рэзалюцыі, нацэленай на актывізацыю інфармацыйнага супрацоўніцтва ўсіх суб'ектаў пагранічнай палітыкі па эфектыўным забеспячэнні нацыянальных і калектыўнай бяспекі краін Садружнасці.
На палях міжнароднага форуму яго ўдзельнікі таксама азнаёмяцца з фотаэкспазіцыяй аб сумеснай дзейнасці пагранічных ведамстваў краін Садружнасці, выстаўкай кніжнай прадукцыі на пагранічную тэматыку, новымі выданнямі друкаванага органа Савета камандуючых Пагранічнымі войскамі краін СНД - часопісаў "Пагранічнік Садружнасці" і "Ветэран граніцы", а таксама цыклам відэафільмаў аб дзейнасці Савета камандуючых Пагранічнымі войскамі.-0-
