24 мая, Мінск /Кар. БЕЛТА/. Новыя напрамкі экалагічнага турызму развіваюцца ў Беларусі. Аб гэтым паведаміў начальнік упраўлення біялагічнай і ландшафтнай разнастайнасці Міністэрства прыродных рэсурсаў і аховы навакольнага асяроддзя Мікалай Свідзінскі сёння на прэс-канферэнцыі ў прэс-цэнтры БЕЛТА.
Паводле слоў Мікалая Свідзінскага, многія прыродаахоўныя ўстановы развіваюць новыя для краіны напрамкі экалагічнага турызму, на базе якіх магчыма фарміраванне паўнацэннага турыстычнага прадукту. Напрыклад, гэта экскурсіі на балотаступах і балотаходзе, арганізацыя абучэння дайвінгу, водныя паходы на плытах, арганізацыя назірання за зубрам еўрапейскім, фотапаляванне на глушцовых такавішчах.
"Такім чынам, экалагічны турызм з'яўляецца важным напрамкам развіцця рэгіёнаў, які дае магчымасць, захоўваючы прыроду, павышаць свой дабрабыт, садзейнічаць прытоку інвестыцый і росту ўзроўню жыцця, перш за ўсё сельскіх жыхароў", - заўважыў спецыяліст.
Ён таксама звярнуў увагу, што Беларусь мае значны патэнцыял для развіцця экатурызму на асабліва ахоўных прыродных тэрыторыях. Сістэма асабліва ахоўных прыродных тэрыторый краіны ўключае тэрыторыі Бярэзінскага біясфернага запаведніка, чатырох нацыянальных паркаў ("Белавежская пушча", "Браслаўскія азёры", "Нарачанскі" і "Прыпяцкі") і 98 заказнікаў рэспубліканскага значэння. Мікалай Свідзінскі растлумачыў, што экатурызм на асабліва ахоўных прыродных тэрыторыях прадугледжвае не толькі турыстычнае падарожжа, але і дзейнасць юрыдычных асоб, фізічных асоб, у тым ліку ІП. Пры гэтым ставяцца важныя мэты эканамічнага характару, такія як устойлівае развіццё рэгіёнаў і паляпшэнне дабрабыту мясцовага насельніцтва.
Для пашырэння экатурызму на асабліва ахоўных тэрыторыях Мінпрыроды і Мінспорту запланавалі да рэалізацыі спецыяльны комплекс мер да 2025 года.
У цэлым за 2016 год на 26 асабліва ахоўных прыродных тэрыторыях (без уліку турыстаў, прынятых запаведнікам і нацыянальнымі паркамі) прынята 22,8 тыс. беларускіх і 2,5 тыс. замежных турыстаў. У параўнанні з 2015 годам рост склаў 103 працэнты. "У грашовым выражэнні аб'ём сродкаў, атрыманых ад турыстычнай дзейнасці, аказваемых платных паслуг (пракат інвентару, аматарскае рыбалоўства), у мінулым годзе вырас на 138 працэнтаў і склаў Br408 тыс.", - дадаў начальнік упраўлення.-0-
