19 верасня, Дуньхуан /Кар. БЕЛТА/. Уплыў ініцыятывы "Адзін пояс і адзін шлях" на працэсы ў глабальнай эканоміцы, а таксама новыя магчымасці шматбаковай кааперацыі ў сферы інфармацыі і тэхналогій абмяркоўваюцца на Форуме супрацоўніцтва СМІ, які афіцыйна адкрыўся сёння ў кітайскім Дуньхуане (правінцыя Ганьсу), перадае карэспандэнт БЕЛТА.
Міжнародная сустрэча, якая сабрала больш за 300 дэлегатаў амаль з 250 сродкаў масавай інфармацыі з розных краін, арганізавана ўплывовай кітайскай газетай "Жэньмінь Жыбаа".
У час цырымоніі адкрыцця форуму намеснік старшыні Пастаяннага камітэта Усекітайскага сходу народных прадстаўнікоў Чжан Пін падкрэсліў, што ініцыятыва КНР "Адзін пояс і адзін шлях" прызначана не толькі садзейнічаць эканамічнаму і тэхналагічнаму развіццю ўсіх яе ўдзельнікаў, але і садзейнічаць вырашэнню праблем і канфліктаў у свеце.
"Гэты важны праект, падтрыманы вельмі многімі дзяржавамі, адпавядае патрэбнасцям сённяшняга дня і інтарэсам усяго чалавецтва. Гэты план не толькі для самога Кітая, гэта план, які будзе садзейнічаць развіццю міжнароднай супольнасці", - сказаў ён.
Чжан Пін таксама адзначыў: "Форум супрацоўніцтва СМІ "Адзін пояс і адзін шлях" з'яўляецца маштабным і прадстаўнічым, ён ужо замацаваў за сабой рэпутацыю эфектыўнай дзелавой пляцоўкі, дзе абмяркоўваюцца важныя аспекты кааперацыі друкаваных, электронных і эфірных медыя з розных рэгіёнаў свету. На наш погляд, рэалізацыя ініцыятывы "Адзін пояс і адзін шлях" павінна грунтавацца на культурным абмене і будаўніцтве мастоў узаемаразумення. І сродкі масавай інфармацыі адыгрываюць тут асаблівую, важную ролю".
Правінцыя Ганьсу з'яўляецца ключавым пунктам ініцыятывы "Адзін пояс і адзін шлях". Горад Дуньхуан, які ў гэтыя дні прымае буйны міжнародны медыяфорум, у свой час быў вядомы як яркая жамчужына старажытнага Шаўковага шляху і валодае багатай гісторыка-культурнай спадчынай.-0-
